ప్రస్తుతం ఆస్ట్రేలియాలో కోహ్లీ పేరు మార్మోగిపోతోంది.. మా ద‌గ్గ‌ర అత‌నికి భారీ క్రేజ్: ఆసీస్ ఉప ప్రధాని

భారత్, ఆస్ట్రేలియా మధ్య ద్వైపాక్షిక సంబంధాలు ఎంత బలంగా ఉన్నాయో చెప్పడానికి ఆస్ట్రేలియా ఉప ప్రధాని, రక్షణ మంత్రి రిచర్డ్ మార్లెస్.. క్రికెట్‌ను ఉదాహరణగా చూపించారు. భారత స్టార్ క్రికెటర్ విరాట్ కోహ్లీకి ఆస్ట్రేలియాలో ఉన్న ప్రజాదరణను, ఐపీఎల్‌లో రాయల్ ఛాలెంజర్స్ బెంగళూరు (ఆర్సీబీ) విజయాన్ని ఆయన ప్రస్తావించారు. ఇరు దేశాల మధ్య బలపడుతున్న సాంస్కృతిక, వ్యూహాత్మక బంధానికి ఇది నిదర్శనమని అభివర్ణించారు.

నిన్న‌ న్యూఢిల్లీలో జరిగిన రెండో భారత్-ఆస్ట్రేలియా రక్షణ మంత్రుల స్థాయి చర్చల్లో పాల్గొన్న అనంతరం మార్లెస్ మాట్లాడారు. 2026 ఐపీఎల్‌లో ఆర్సీబీ వరుసగా రెండోసారి టైటిల్ గెలవడాన్ని ఆయన ప్రశంసించారు. "ప్రస్తుతం ఆస్ట్రేలియాలో విరాట్ కోహ్లీ పేరు మార్మోగిపోతోంది. నా చిన్నప్పుడు బిషన్ బేడీ వంటి దిగ్గజాలను చూశాం. ఇప్పుడు కోహ్లీ ఓ పెద్ద స్టార్" అని అన్నారు. గుజరాత్ టైటాన్స్‌తో జరిగిన ఫైనల్‌లో కోహ్లీ అజేయంగా 75 పరుగులు చేయడంతో పాటు ఆస్ట్రేలియా ఆటగాళ్లు జోష్ హేజిల్‌వుడ్, టిమ్ డేవిడ్ ప్రదర్శన కూడా ఆర్సీబీ గెలుపునకు దోహదపడిందని గుర్తుచేశారు.

"నిన్న రాత్రి ఐపీఎల్‌లో ఆర్సీబీ గెలిచిన తీరులో స్పష్టంగా భారత్-ఆస్ట్రేలియా ద్వైపాక్షిక బంధం కనిపించింది. ఇది ఇరు దేశాల మధ్య ఉన్న సంబంధానికి ఒక ప్రతీక అని నేను భావిస్తున్నాను" అని మార్లెస్ వ్యాఖ్యానించారు. మైదానంలో ఆటగాళ్ల మధ్య ఉన్న సహకారం, ఇరు దేశాల మధ్య విస్తృత సంబంధాలను ప్రతిబింబిస్తోందని ఆయన పేర్కొన్నారు. కపిల్ దేవ్ వంటి దిగ్గజాలను కూడా గుర్తుచేసుకుంటూ, చాలా కాలంగా క్రికెట్ ద్వారా ఇరు దేశాల ప్రజల మధ్య సంబంధాలు బలపడ్డాయని తెలిపారు.

ఈ సమావేశంలో ఇరు దేశాల రక్షణ సహకారం, కొత్త ఒప్పందాలు, సంయుక్త సైనిక విన్యాసాలు, సముద్ర భద్రత వంటి కీలక అంశాలపై సమీక్ష జరిపారు. సాధారణంగా ఎంతో గంభీరంగా సాగే రక్షణ చర్చల మధ్య, మార్లెస్ చేసిన ఈ వ్యాఖ్యలు వాతావరణాన్ని తేలికపరిచాయి. క్వాడ్ వంటి వ్యూహాత్మక కూటముల్లో భాగస్వాములుగా ఉన్న దేశాల మధ్య, క్రికెట్ వంటి క్రీడలు దౌత్యపరంగా సంబంధాలను మరింత బలోపేతం చేయడానికి ఎలా ఉపయోగపడతాయో ఈ సంఘటన స్పష్టం చేస్తోంది.