కోహ్లీని చేతులు జోడించి పలకరించిన వైభవ్.. కౌగిలించుకుని మాట్లాడిన కింగ్.. ఇదిగో వీడియో!

అహ్మదాబాద్‌లోని నరేంద్ర మోదీ స్టేడియం రాయల్ ఛాలెంజర్స్ బెంగళూరు (ఆర్‌సీబీ) సంబరాలతో హోరెత్తుతోంది. ఐపీఎల్ 2026 ఫైనల్‌లో గుజరాత్ టైటాన్స్‌పై 5 వికెట్ల తేడాతో విజయం సాధించి, తొలిసారి టైటిల్ గెలిచిన ఆనందంలో ఆ జట్టు మునిగిపోయింది. ఆ ఉత్సాహభరిత వాతావరణంలో భారత క్రికెట్ వర్తమానం, భవిష్యత్ మధ్య ఒక అపురూప దృశ్యం ఆవిష్కృతమైంది. 15 ఏళ్ల యువ సంచలనం వైభవ్ సూర్యవంశీ, టీమిండియా స్టార్ బ్యాటర్ విరాట్ కోహ్లీని కలవడం అందరి దృష్టిని ఆకర్షించింది.

విజయోత్సవాల మధ్య, వైభవ్ సూర్యవంశీ ఎంతో వినమ్రంగా చేతులు జోడించి నమస్కరిస్తూ విరాట్ కోహ్లీ వద్దకు వచ్చాడు. వెంటనే కోహ్లీ ఆ యువ కెరటాన్ని ఆత్మీయంగా కౌగిలించుకుని అభినందించాడు. ఆ తర్వాత వైభవ్ భుజంపై చేయి వేసి చాలాసేపు ముచ్చటించాడు. ఈ అపురూప దృశ్యాలు కెమెరాల్లో రికార్డు కాగా, ప్రస్తుతం సోషల్ మీడియాలో వైరల్‌గా మారాయి. వారిద్దరి మధ్య ఏం సంభాషణ జరిగిందో ఎవరికీ తెలియకపోయినా, ఈ దృశ్యం భారత క్రికెట్ అభిమానుల మనసులను గెలుచుకుంది.

ఈ సీజన్‌లో తన దూకుడు బ్యాటింగ్‌తో వైభవ్ సూర్యవంశీ అందరినీ ఆకట్టుకున్నాడు. ఐపీఎల్ 2026లో ఏకంగా 776 పరుగులు సాధించి, టోర్నమెంట్‌లో అత్యధిక పరుగులు చేసిన ఆటగాడిగా నిలిచాడు. అతని అద్భుతమైన బ్యాటింగ్ టెక్నిక్‌ను చూసి, భవిష్యత్ టెస్ట్ క్రికెటర్ అవుతాడంటూ స్వయంగా సచిన్ టెండూల్కర్ ప్రశంసించాడు.

ఈ సీజన్‌లోనే గువాహ‌టిలో ఆర్‌సీబీ బౌలర్లపై వైభవ్ మెరుపు ఇన్నింగ్స్ ఆడిన తర్వాత, కోహ్లీ అతని క్యాప్‌పై సంతకం చేసి అభినందించాడు. కానీ, ఫైనల్ తర్వాత చోటుచేసుకున్న‌ ఆసక్తికర ఈ ఘటన మరింత ప్రత్యేకం. గెలుపోటములకు అతీతంగా, ఒక దిగ్గజ ఆటగాడు.. తన అడుగుజాడల్లో నడవాలని ఆశిస్తున్న యువ కెరటానికి మార్గనిర్దేశం చేస్తున్నట్లుగా ఈ ఘటన నిలిచిపోయింది. తమ ఆరాధ్య ఆటగాడి నుంచి లభించిన ఈ గుర్తింపు వైభవ్ కెరీర్‌లో ఎప్పటికీ గుర్తుండిపోతుంది.