విజయ్ గారి పట్ల గర్విస్తున్నాను: చెన్నైలో రామ్ చరణ్

గ్లోబల్ స్టార్ రామ్ చరణ్ 'పెద్ది' చిత్రం ప్రమోషన్ల కోసం చెన్నైలో పర్యటించారు. ఈ సందర్భంగా ఏర్పాటు చేసిన మీడియా సమావేశంలో ఆయన మాట్లాడుతూ, చెన్నైతో తనకున్న విడదీయరాని బంధాన్ని గుర్తుచేసుకుని భావోద్వేగానికి గురయ్యారు. తన కెరీర్, కొత్త సినిమా, సహనటులపై ఆసక్తికర వ్యాఖ్యలు చేశారు. ముఖ్యంగా తమిళనాడు ముఖ్యమంత్రి, నటుడు విజయ్‌పై చేసిన ప్రశంసలు ప్రత్యేక ఆకర్షణగా నిలిచాయి.

చెన్నైతో విడదీయరాని బంధం
చెన్నైకి వచ్చినప్పుడల్లా తనకు మాటలు రావని, ఒకరకమైన భావోద్వేగంలో ఉండిపోతానని రామ్ చరణ్ అన్నారు. "నేను పుట్టింది, పెరిగింది ఇక్కడే. మా అమ్మగారిది కూడా ఈ నగరమే. అందుకే చెన్నైకి వస్తే నా సొంత ఇంటికి వచ్చిన అనుభూతి కలుగుతుంది. మగధీర, ఆర్ఆర్ఆర్ వంటి సినిమాల ప్రమోషన్లకు వచ్చినప్పుడు కూడా ఇదే ఫీలింగ్ కలిగింది" అని ఆయన తెలిపారు. వేదికపై ఉన్న ఎందరో లెజెండ్స్ ముందు మాట్లాడటం సంతోషంగా ఉందన్నారు.

ఇది కష్టం కాదు.. ఇష్టంతో చేసిన సినిమా
తన కొత్త సినిమా గురించి మాట్లాడుతూ, ఇది ఎంతో ఇష్టపడి, ప్రేమించి చేసిన చిత్రమని చరణ్ స్పష్టం చేశారు. "ఈ సినిమా కోసం మేమంతా రెండున్నరేళ్లుగా దాదాపు 285 రోజులు పనిచేశాం. కానీ మా దర్శకుడు బుచ్చిబాబు మాత్రం గత ఐదారేళ్లుగా ఈ కథపైనే జీవిస్తున్నారు. సుకుమార్ గారు నాకు బుచ్చిబాబు లాంటి అద్భుతమైన రైటర్‌ను పరిచయం చేసినందుకు ఆయనకు ధన్యవాదాలు. ఈ చిత్రానికి ఏ.ఆర్. రెహమాన్ గారు సెంట్రల్ పిల్లర్ లాంటి వారు," అని వివరించారు. షూటింగ్ తర్వాత ప్రతిరోజూ ఇంటికి వెళ్లి సినిమా గురించి ఆపకుండా మాట్లాడేవాడినని, రంగస్థలం, ఆర్ఆర్ఆర్ తర్వాత మళ్లీ అంతగా ప్రేమించిన సినిమా ఇదని, ఇది కచ్చితంగా బ్లాక్‌బస్టర్ అవుతుందనే నమ్మకాన్ని వ్యక్తం చేశారు.

లెజెండ్స్‌పై ప్రశంసల వర్షం
ఈ చిత్రంలో పనిచేసిన లెజెండ్స్‌ను చరణ్ ప్రత్యేకంగా అభినందించారు. శివరాజ్‌కుమార్ గురించి మాట్లాడుతూ, "ఆయన స్క్రీన్‌పైకి వస్తే నిప్పుల వర్షం కురిసినట్టు ఉంటుంది. జైలర్ సినిమాలో ఆయన నటన ఐకానిక్" అని కొనియాడారు. సినిమాటోగ్రాఫర్ రత్నవేలుతో తనకున్న అనుబంధాన్ని గుర్తుచేసుకుంటూ, ఆయన విజువల్స్ అద్భుతంగా ఉంటాయని ప్రశంసించారు. జాన్వీ కపూర్ తన నటనతో సినిమాకు కొత్త రంగు అద్దారని, ఆమె ఎంతో సిన్సియర్ నటి అని అన్నారు.

బుచ్చిబాబు గిఫ్ట్, విజయ్‌కి అభినందనలు
ఈ సినిమా కోసం మూడు రకాల శారీరక మార్పులకు లోనయ్యానని, అయితే దర్శకుడు బుచ్చిబాబును డీల్ చేయడమే తనకు అతిపెద్ద ఛాలెంజ్‌గా అనిపించిందని చరణ్ చమత్కరించారు. కుస్తీ సన్నివేశాల చిత్రీకరణలో తన చేతికి గాయమైందని, దానిని బుచ్చిబాబు తనకు ఇచ్చిన అందమైన బహుమతిగా భావిస్తున్నానని నవ్వుతూ చెప్పారు.

అనంతరం తమిళనాడు సీఎం విజయ్ గురించి మాట్లాడుతూ, "కెరీర్ శిఖర స్థాయిలో ఉన్నప్పుడు, ఇంత స్టార్‌డమ్ ఉన్న సమయంలో వాటన్నింటినీ వదిలి ప్రజాసేవ కోసం ముందుకు రావడం స్ఫూర్తిదాయకం. ఒక ఫిల్మ్ ఇండస్ట్రీ వ్యక్తిగా ఆయనను చూసి గర్వపడుతున్నాను" అని రామ్ చరణ్ అభినందనలు తెలిపారు. 

పెద్ది సినిమా పిల్లలకు కూడా స్ఫూర్తినిచ్చేలా ఉంటుందని, తన లైబ్రరీలో జీవితాంతం గుర్తుండిపోయే చిత్రం అని తెలిపారు.