కిటికీ దగ్గర సిగరెట్‌ కాల్చినా పిల్లల ప్రాణాలకు ముప్పే!

‘‘మేము పిల్లల ముందు సిగరెట్ తాగడం లేదు.. కిటికీ దగ్గరో, బాల్కనీలోనో కాలుస్తున్నా’’ అని చాలామంది పొగతాగేవాళ్లు సమర్థించుకుంటారు. కానీ ఇలా చేయడం వల్ల పిల్లలకు ఎలాంటి ముప్పూ ఉండదనుకోవడం చాలా పెద్ద భ్రమ అని డాక్టర్లు హెచ్చరిస్తున్నారు. ఇలాంటి తాత్కాలిక ఏర్పాట్లు పిల్లలను ‘పరోక్ష ధూమపానం’ బారిన పడకుండా అస్సలు కాపాడలేవని స్పష్టం చేస్తున్నారు.

తిష్టవేసే విష రసాయనాలు
సిగరెట్ పొగలో నికోటిన్, కార్బన్ మోనాక్సైడ్, ఫార్మాల్డిహైడ్ వంటి వేలాది ప్రమాదకర రసాయనాలు ఉంటాయి. కిటికీ పక్కన నిలబడి తాగినా పొగలోని విష కణాలు గాలి ద్వారా ఇల్లంతా వ్యాపిస్తాయి. అవి ఇంట్లోని సోఫాలు, పరదాలు, బట్టలు, బెడ్ షీట్లు, గోడలకు గట్టిగా అంటుకుపోతాయి. పెద్దల కంటే పిల్లలు చాలా వేగంగా శ్వాస తీసుకుంటారు. అందువల్ల ఈ విషపూరిత గాలి వారి శరీరంలోకి సులభంగా ప్రవేశిస్తుంది.

ముంచుకొస్తున్న ముప్పు
సిగరెట్ తాగడం ఆపేసిన తర్వాత కూడా గాలిలో, వస్తువులపై మిగిలిపోయే విష వ్యర్థాలనే ‘థర్డ్ హ్యాండ్ స్మోక్’ అంటారు. ఈ హానికరమైన కణాలు ఇంట్లోని వస్తువులపై చాలా కాలం పాటు అలాగే ఉండిపోతాయి. పిల్లలు ఆయా వస్తువులను తాకినప్పుడు లేదా అక్కడ ఆడుకుంటున్నప్పుడు ఆ విష రసాయనాలు వారి చర్మం ద్వారా, శ్వాస ద్వారా లోపలికి వెళ్లిపోతాయి. చాలామంది తల్లిదండ్రులు ఈ ప్రమాదాన్ని అస్సలు గుర్తించలేకపోతున్నారు.

పిల్లల ఊపిరితిత్తులపై ప్రభావం
ఇంట్లో పొగతాగే అలవాటున్నవారి పిల్లల్లో రోగనిరోధక శక్తి, ఊపిరితిత్తుల ఎదుగుదల దారుణంగా దెబ్బతింటుంది. దీనివల్ల పిల్లలు తరచూ దగ్గు, ఉబ్బసం, ఆస్తమా, అలర్జీలు, గొంతు మంట, శ్వాసకోశ ఇన్‌ఫెక్షన్‌ బారిన పడుతుంటారు. మరీ చిన్న పిల్లల్లో అయితే బ్రాంకైటిస్, నిమోనియా, చెవి ఇన్‌ఫెక్షన్లు, నిద్రలేమి సమస్యలు వస్తాయి. కొన్ని తీవ్రమైన కేసుల్లో శిశువులు హఠాత్తుగా మరణించే ప్రమాదం కూడా ఉంది.

ఇల్లే రక్షణ కవచం కావాలి
పిల్లలను ఈ ప్రమాదం నుంచి కాపాడుకోవాలంటే కిటికీలు తెరిచి ఉంచడం, బాల్కనీలో తాగడం లాంటి పనులు సరిపోవని నిపుణులు చెబుతున్నారు. ఇల్లు, కార్లను పూర్తిగా ‘స్మోక్-ఫ్రీ’గా మార్చడమే ఏకైక మార్గం. పిల్లల భవిష్యత్తు, ఆరోగ్యం కోసం ఇంట్లో పొగతాగడం పూర్తిగా మానేయాలి. వీలైతే ఆ అలవాటుకు శాశ్వతంగా స్వస్తి పలకడమే ఉత్తమమైన నిర్ణయం.