సెంచరీ మిస్ చేసుకున్న వైభవ్‌ను పరాగ్ తిట్టాడా?.. డగౌట్‌లో ఏం జరిగింది?

ఐపీఎల్ ప్లేఆఫ్స్‌లో అద్భుత ఫామ్‌లో ఉన్న రాజస్థాన్ రాయల్స్ యువ సంచలనం వైభవ్ సూర్యవంశీ మరోసారి సెంచరీకి అడుగు దూరంలో నిలిచాడు. గుజరాత్ టైటాన్స్‌తో జరిగిన కీలకమైన క్వాలిఫయర్ 2 మ్యాచ్‌లో 96 పరుగుల వద్ద ఔటై తీవ్ర నిరాశతో పెవిలియన్ చేరాడు. అనంతరం డగౌట్‌లో కెప్టెన్ రియాన్ పరాగ్ అతడితో సీరియస్‌గా మాట్లాడటం ఇప్పుడు క్రీడా వర్గాల్లో చర్చనీయాంశంగా మారింది. పరాగ్ అతడికి క్లాస్ తీసుకున్నాడా? లేక ఓదార్పునిస్తూ సలహాలు ఇచ్చాడా అనే దానిపై సోషల్ మీడియాలో పెద్ద చర్చే జరుగుతోంది.

ఒకే తప్పు.. రెండోసారి..
ఈ మ్యాచ్‌లో అద్భుతంగా ఆడిన 15 ఏళ్ల వైభవ్, సెంచరీ పూర్తి చేస్తాడని అందరూ భావించారు. అయితే, కగిసో రబడా వేసిన ఇన్నింగ్స్ 16వ ఓవర్‌లో థర్డ్ మ్యాన్ దిశగా షాట్ ఆడి అక్కడే ఫీల్డర్‌కు క్యాచ్ ఇచ్చి వెనుదిరిగాడు. మూడు రోజుల క్రితం సన్‌రైజర్స్ హైదరాబాద్‌తో జరిగిన ఎలిమినేటర్ మ్యాచ్‌లోనూ వైభవ్ సరిగ్గా 96 పరుగుల వద్దే ఇలాంటి షాట్ ఆడే ఔటయ్యాడు. వరుసగా రెండు కీలక నాకౌట్ మ్యాచ్‌లలో ఒకే తరహాలో సెంచరీ చేజార్చుకోవడంతో వైభవ్ మైదానంలోనే తీవ్ర ఆవేదనకు గురయ్యాడు. డగౌట్‌కు చేరిన తర్వాత కెప్టెన్ రియాన్ పరాగ్ అతని వద్దకు వచ్చి షాట్ సెలెక్షన్ గురించి తీవ్రంగా చర్చిస్తున్న దృశ్యాలు కెమెరాలకు చిక్కాయి.

భయపడని పోరాటం..
ఈ మ్యాచ్‌కు వాడిన పిచ్ బౌలింగ్‌కు అనుకూలిస్తుండటంతో బ్యాటింగ్ చేయడం కష్టంగా మారింది. ఆరంభంలోనే వికెట్లు కోల్పోయి రాజస్థాన్ కష్టాల్లో పడింది. ఆ సమయంలో క్రీజులోకి వచ్చిన వైభవ్‌ను కట్టడి చేయడానికి గుజరాత్ బౌలర్లు బౌన్సర్లతో దాడి చేశారు. రబడా వేసిన ఓ బౌన్సర్ అతడి హెల్మెట్‌కు బలంగా తాకింది. అయినా ఏమాత్రం భయపడని వైభవ్ ఆ తర్వాత అదే రబడా వేసిన 153 కిలోమీటర్ల వేగవంతమైన బంతిని స్ట్రెయిట్ సిక్సర్‌గా మలిచి తన ధైర్యాన్ని చాటాడు. కేవలం 47 బంతుల్లో 8 ఫోర్లు, 7 సిక్సర్లతో 96 పరుగులు చేసి జట్టుకు భారీ స్కోరు అందించడంలో కీలక పాత్ర పోషించాడు.

మ్యాచ్ అనంతరం రియాన్ పరాగ్ మాట్లాడుతూ "వైభవ్ గుడ్డిగా షాట్లు ఆడడు, ప్రతీ షాట్‌ను లెక్కలేసుకుని ఆడతాడు" అని ప్రశంసించాడు. దీంతో డగౌట్‌లో జరిగింది క్లాస్ పీకడం కాదని, ఒక యువ కెరటాన్ని భవిష్యత్తు కోసం తీర్చిదిద్దే ప్రయత్నమేనని స్పష్టమవుతోంది.