'కాలా హిరణ్'... సల్మాన్ జింకల వేట, లారెన్స్ బిష్ణోయ్ తో వైరంపై సినిమా

బాలీవుడ్ సూపర్‌స్టార్ సల్మాన్ ఖాన్ కృష్ణ జింకల వేట కేసు మరోసారి వార్తల్లోకి వచ్చింది. ఈ కేసు ఆధారంగా తెరకెక్కుతున్న ‘కాలా హిరణ్’ అనే సినిమా ఫస్ట్ లుక్ పోస్టర్‌ను శుక్రవారం విడుదల చేశారు. ఈ చిత్రం సల్మాన్ ఖాన్, గ్యాంగ్‌స్టర్ లారెన్స్ బిష్ణోయ్ మధ్య ఉన్న వైరాన్ని ప్రధానంగా చూపిస్తుండటంతో సర్వత్రా ఆసక్తి నెలకొంది.

ఈ సినిమా గురించి నిర్మాత అమిత్ జానీ మాట్లాడుతూ.. "1998లో జోధ్‌పూర్‌లోని కకానీ గ్రామంలో జరిగిన కృష్ణ జింక వేట కేసు, ఆ తర్వాత నడిచిన కోర్టు డ్రామా, సల్మాన్ ఖాన్‌కు, లారెన్స్ బిష్ణోయ్‌కు మధ్య నెలకొన్న తీవ్రమైన వైరాన్ని ఈ సినిమాలో చూపిస్తున్నాం. ఇది ఒక క్రైమ్ థ్రిల్లర్, కోర్ట్‌రూమ్ డ్రామాగా సాగుతుంది" అని తెలిపారు. ఉత్తరప్రదేశ్‌లోని సంభల్, మొరాదాబాద్ వంటి నగరాల్లో ఈ సినిమా షూటింగ్ జరిపినట్టు ఆయన వివరించారు.

అప్పట్లో సల్మాన్‌తో పాటు సైఫ్ అలీ ఖాన్, టబు, సోనాలి బింద్రే, సతీష్ షా వంటి నటులు కూడా ఉన్నారని, వేట జరిగిన తీరు, సల్మాన్ అరెస్ట్, శిక్ష వంటి అంశాలను ఈ సినిమాలో ప్రస్తావించినట్టు నిర్మాత పేర్కొన్నారు. బిష్ణోయ్ వర్గానికి చెందిన ప్రజలు కృష్ణ జింకలను పవిత్రంగా భావిస్తారు. ఈ కారణంగానే లారెన్స్ బిష్ణోయ్ గ్యాంగ్ సల్మాన్‌ను లక్ష్యంగా చేసుకుంది. అక్టోబర్ 2024లో సల్మాన్ సన్నిహితుడు బాబా సిద్ధిఖీని ముంబైలో కాల్చి చంపినప్పుడు, ఆ దాడికి బాధ్యత తమదేనని బిష్ణోయ్ గ్యాంగ్ ప్రకటించుకోవడం గమనార్హం.

ఈ పరిణామాల నేపథ్యంలో వస్తున్న ఈ సినిమాపై అంచనాలు పెరిగాయి. జూన్ 20న ‘కాలా హిరణ్’ టీజర్‌ను విడుదల చేయనున్నట్టు చిత్ర బృందం ప్రకటించింది.