ఏఐ వచ్చినా ఉద్యోగాలు తీసేయం.. 9 లక్షల మంది ఉద్యోగులకు జెడి.కామ్ భరోసా

ఆర్టిఫిషియల్ ఇంటెలిజెన్స్ (ఏఐ), ఆటోమేషన్ కారణంగా ప్రపంచవ్యాప్తంగా ఉద్యోగ భద్రతపై ఆందోళనలు పెరుగుతున్న తరుణంలో చైనాకు చెందిన ఈ-కామర్స్ దిగ్గజం జెడి.కామ్ (JD.com) తన ఉద్యోగులకు చారిత్రక హామీ ఇచ్చింది. ఏఐ, రోబోటిక్స్ టెక్నాలజీల వల్ల ఏ ఒక్క ఫ్రంట్‌లైన్ ఉద్యోగిని కూడా విధుల నుంచి తొలగించబోమని కంపెనీ వ్యవస్థాపకుడు, సీఈవో లియు చియాంగ్‌డాంగ్ (రిచర్డ్ లియు) స్పష్టం చేశారు. సుమారు 9 లక్షల మంది ఉద్యోగులకు ఆయన ఇచ్చిన ఈ భరోసా ఇప్పుడు అంతర్జాతీయంగా చర్చనీయాంశమైంది.

ఈ నెల 27న జరిగిన కంపెనీ అంతర్గత సమావేశంలో లియు ఈ కీలక ప్రకటన చేశారు. టెక్నాలజీ వేగంగా అభివృద్ధి చెందుతున్నప్పటికీ, తమ కంపెనీలో పనిచేస్తున్న లక్షలాది మంది బ్లూ-కాలర్ కార్మికులు సహా అందరి ఉద్యోగాలను కాపాడటానికి అన్ని విధాలా ప్రయత్నిస్తామని ఆయన తెలిపారు. ముఖ్యంగా, డెలివరీ సిబ్బంది, గిడ్డంగుల (వేర్‌హౌస్) నిర్వాహకులు వంటి ఫ్రంట్‌లైన్ కార్మికుల ఉద్యోగాలకు పూర్తి భద్రత కల్పిస్తామని ఆయన స్పష్టమైన హామీ ఇచ్చారు.

"యంత్రాల కారణంగా ఉద్యోగాలు కోల్పోయిన ఒక్క ఫ్రంట్‌లైన్ వర్కర్‌ను కూడా జెడి.కామ్ తొలగించదు" అని లియు తేల్చిచెప్పారు. టెక్నాలజీ కారణంగా ప్రభావితమయ్యే ఉద్యోగులకు అవసరమైన శిక్షణ ఇచ్చి, వారిని ఇతర విభాగాల్లోకి బదిలీ చేస్తామని వివరించారు. ఉద్యోగ భద్రతకు అత్యంత ప్రాధాన్యం ఇస్తున్నామని, ఇది కేవలం మాటలకే పరిమితం కాదని ఆయన అన్నారు.

'చైనా అమెజాన్'గా పేరుగాంచిన జెడి.కామ్, దేశంలో అత్యధిక మందికి ఉపాధి కల్పిస్తున్న ప్రైవేట్ సంస్థల్లో ఒకటి. ఈ సంస్థ డ్రోన్‌లు, అటానమస్ వాహనాలు, మానవ రహిత గిడ్డంగుల వంటి ఆటోమేషన్ టెక్నాలజీని పెద్ద ఎత్తున వినియోగిస్తోంది. ఈ నేపథ్యంలో ఉద్యోగులలో తమ భవిష్యత్తుపై నెలకొన్న ఆందోళనలను తొలగించేందుకే లియు ఈ ప్రకటన చేశారు. సాంకేతిక ఆవిష్కరణలతో పాటు సామాజిక బాధ్యతకు కూడా తమ కంపెనీ కట్టుబడి ఉంటుందని ఆయన సందేశమిచ్చారు.

ఇటీవల చైనాలో ఏఐ ఆధారిత ఉద్యోగాల తొలగింపుపై తీవ్ర వ్యతిరేకత వ్యక్తమవుతోంది. కేవలం ఏఐ పని చేయగలదనే కారణంతో ఉద్యోగులను తొలగించడాన్ని చైనా కోర్టులు కూడా తప్పుబట్టాయి. ఈ నేపథ్యంలో లియు చేసిన ప్రకటనకు ప్రాధాన్యం ఏర్పడింది. ఈ ప్రసంగం చైనా సోషల్ మీడియాలో వైరల్ కావడంతో, టెక్నాలజీ యుగంలో కార్పొరేట్ సంస్థల బాధ్యతపై కొత్త చర్చ మొదలైంది.