'పెద్ది' కథపై ప్రధాని మోదీ ఆసక్తి.. ఆసక్తికర విషయం బయటపెట్టిన రామ్ చరణ్

మెగా పవర్ స్టార్ రామ్ చరణ్ నటిస్తున్న పాన్-ఇండియా చిత్రం 'పెద్ది' విడుదల తేదీ దగ్గరపడటంతో ప్రమోషన్ల వేగం పెరిగింది. జూన్ 4న ప్రపంచవ్యాప్తంగా థియేటర్లలోకి రానున్న ఈ సినిమా ప్రచారంలో భాగంగా, చిత్ర బృందం మే 28న న్యూఢిల్లీలో మీడియా సమావేశం నిర్వహించింది. ఈ కార్యక్రమానికి హీరో రామ్ చరణ్, హీరోయిన్ జాన్వీ కపూర్, దర్శకుడు బుచ్చిబాబు సానా, ఇతర ముఖ్య నటీనటులు హాజరయ్యారు.

ఈ సందర్భంగా రామ్ చరణ్ ఒక ఆసక్తికరమైన విషయాన్ని పంచుకున్నారు. గతంలో తాను ఢిల్లీలో ప్రధానమంత్రి నరేంద్ర మోదీని కలిసినప్పుడు ఆయన 'పెద్ది' సినిమా కథ గురించి అడిగారని గుర్తుచేసుకున్నారు. గ్రామీణ, గిరిజన కమ్యూనిటీలను క్రీడల ద్వారా ఎలా శక్తివంతం చేయవచ్చనేదే ఈ సినిమా కాన్సెప్ట్ అని తాను వివరించినట్లు తెలిపారు. తన మాటలు విన్న ప్రధాని పశ్చిమ బెంగాల్‌లోని ఒక మారుమూల గ్రామానికి చెందిన మహమ్మద్ అనే ఫుట్‌బాలర్ కథను గుర్తుచేశారని చరణ్ చెప్పారు. ఆ ఒక్క ఆటగాడి స్ఫూర్తితో ఆ గ్రామంలో ఇప్పుడు 80 శాతం మంది ఫుట్‌బాల్ ఆడుతున్నారని మోదీ తనకు వివరించారని తెలిపారు. 'పెద్ది' కూడా అలాంటి మట్టి వాసన ఉన్న, స్ఫూర్తిదాయకమైన కథ అని చరణ్ పేర్కొన్నారు.

గ్రామీణ నేపథ్యంతో వచ్చిన తన గత చిత్రాలు ఘన విజయం సాధించాయని, 'పెద్ది' కూడా అదే కోవలో ప్రేక్షకులను అలరిస్తుందని రామ్ చరణ్ ధీమా వ్యక్తం చేశారు. రెండున్నరేళ్ల పాటు చిత్ర బృందం పడిన కష్టం కేవలం వినోదాన్నే కాకుండా స్ఫూర్తిని కూడా పంచుతుందని అన్నారు. ఢిల్లీ మీడియాకు ధన్యవాదాలు తెలిపారు.

ఈ కార్యక్రమంలో మాట్లాడిన హీరోయిన్ జాన్వీ కపూర్ ఈ సినిమా తన మూలాలను కనుగొనే ఒక ప్రత్యేకమైన ప్రయాణం లాంటిదని అభివర్ణించారు. కుటుంబమంతా కలిసి చూడదగిన చిత్రమిదని ఆమె అన్నారు. ఈ సమావేశంలో నటులు దివ్యేందు శర్మ, బొమన్ ఇరానీ కూడా పాల్గొన్నారు.

మైత్రీ మూవీ మేకర్స్, సుకుమార్ రైటింగ్స్, వెంకట సతీశ్ కిలారు నిర్మిస్తున్న ఈ స్పోర్ట్స్ డ్రామాకు బుచ్చిబాబు సానా దర్శకత్వం వహిస్తున్నారు. ఏఆర్ రెహమాన్ సంగీతం అందించిన 'మస్సా మస్సా', 'హేలలల్లో' పాటలకు ఇప్పటికే మంచి స్పందన లభించింది. యూ/ఏ సర్టిఫికేషన్ పూర్తి చేసుకున్న ఈ చిత్రం, డాల్బీ సినిమా ఫార్మాట్‌లో కూడా భారీ స్థాయిలో విడుదల కానుంది. బెంగళూరులో జరిగిన ఈవెంట్ తర్వాత ఢిల్లీ ప్రెస్ మీట్‌తో సినిమాపై అంచనాలు మరింత పెరిగాయి.