వైభవ్ సూర్యవంశీ నీడలో అతడు ఎదగలేడు... రాజస్థాన్ రాయల్స్ ను వదిలేయాలి: రాయుడు ఆసక్తికర వ్యాఖ్యలు

భారత యువ ఓపెనర్ యశస్వి జైస్వాల్‌కు మాజీ ఆటగాడు అంబటి రాయుడు ఒక సంచలన సూచన చేశాడు. రాజస్థాన్ రాయల్స్ (ఆర్‌ఆర్) జట్టును వీడితేనే జైస్వాల్ కెరీర్‌కు మంచిదని, అతడు మరో జట్టుకు మారాల్సిన అవసరం ఉందని స్పష్టం చేశాడు. యువ సంచలనం వైభవ్ సూర్యవంశీ దూకుడు ముందు జైస్వాల్ ప్రదర్శన మసకబారుతోందని రాయుడు అభిప్రాయపడ్డాడు.

ఈ ఐపీఎల్ సీజన్‌లో ఆరెంజ్ క్యాప్ హోల్డర్‌గా నిలిచిన వైభవ్ సూర్యవంశీ అద్భుత ఫామ్‌తో చెలరేగుతున్నాడు. ఎలిమినేటర్ మ్యాచ్‌లో సూర్యవంశీ కేవలం 29 బంతుల్లో 97 పరుగులతో విరుచుకుపడగా, అదే మ్యాచ్‌లో జైస్వాల్ 29 బంతులు ఆడి 29 పరుగులే చేశాడు. ఈ నేపథ్యంలో రాయుడు మాట్లాడుతూ, "జైస్వాల్ తన జట్టును మార్చుకోవాలి. ప్రతీసారి తోటి ఆటగాడి నీడలో మగ్గిపోకూడదు. అతడికంటూ సొంత స్టార్‌డమ్ ఉంది. మరో జట్టుకు వెళితే ఒంటిచేత్తో మ్యాచ్‌లు గెలిపించగలడు. అతడికి ఆ స్వేచ్ఛ, అందుకు తగిన వేదిక అవసరం" అని అన్నాడు.

జైస్వాల్‌కు ముంబై ఇండియన్స్ జట్టు సరైన గమ్యస్థానం అవుతుందని రాయుడు సూచించాడు. రోహిత్ శర్మ కెరీర్ చివరి దశలో ఉన్నందున, ముంబై జట్టులో ఓపెనర్‌గా, భవిష్యత్ నాయకుడిగా ఎదిగేందుకు జైస్వాల్‌కు మంచి అవకాశం లభిస్తుందని విశ్లేషించాడు. 2020 నుంచి రాజస్థాన్ రాయల్స్‌కు ఆడుతున్న జైస్వాల్, ఇప్పటికే టీమిండియాలో కీలక ఆటగాడిగా మారిన నేపథ్యంలో రాయుడు వ్యాఖ్యలు క్రికెట్ వర్గాల్లో ఆసక్తికర చర్చకు దారితీశాయి.