నిద్రలో కాళ్ల పిక్కలు పట్టేస్తున్నాయా? అయితే ఇది మీకోసమే!

చాలా మందికి రాత్రిపూట గాఢ నిద్రలో ఉన్నప్పుడు అకస్మాత్తుగా కాలి పిక్కలు పట్టేసి తీవ్రమైన నొప్పితో మెలకువ వస్తుంది. ఇది సర్వసాధారణమైన సమస్యే, ముఖ్యంగా 40 ఏళ్లు దాటిన వారిలో ఎక్కువగా కనిపిస్తుంది. సాధారణంగా ఇది ప్రమాదకరం కానప్పటికీ, నిద్రకు ఆటంకం కలిగించి, మరుసటి రోజు కూడా నొప్పిని మిగులుస్తుంది.

ప్రధాన కారణాలు ఏంటి?

రోజంతా నిలబడటం, నడవడం వల్ల కండరాలు అలసిపోవడం దీనికి ఒక ముఖ్య కారణం. సరైన విశ్రాంతి, స్ట్రెచింగ్ లేనప్పుడు రాత్రివేళ కండరాలు పట్టేస్తాయి. అలాగే, శరీరంలో నీటి శాతం (డీహైడ్రేషన్) తగ్గడం, మెగ్నీషియం, పొటాషియం, కాల్షియం వంటి ఖనిజాల సమతుల్యత లోపించడం కూడా కండరాల పనితీరుపై ప్రభావం చూపుతుంది. శరీరంలో నీటి కొరత ఖనిజాల సమతుల్యతను దెబ్బతీస్తుందని నిపుణులు వివరిస్తున్నారు. వీటితో పాటు, పడుకునే భంగిమ సరిగా లేకపోవడం, నరాల సమస్యలు, రక్త ప్రసరణ తగ్గడం, కొన్ని రకాల మందులు కూడా ఈ సమస్యకు దారితీయవచ్చు.

నివారణ, ఉపశమన మార్గాలు

నొప్పి వచ్చిన వెంటనే పిక్క కండరాన్ని నెమ్మదిగా సాగదీయాలి. పాదాన్ని పైకి లేపి మడిమను ముందుకు నెట్టడం ద్వారా తక్షణ ఉపశమనం పొందవచ్చు. ఆ ప్రదేశంలో మసాజ్ చేయడం, వేడి నీటి కాపడం పెట్టడం కూడా మేలు చేస్తుంది.

ఈ సమస్యను నివారించడానికి రోజూ పడుకునే ముందు పిక్కలు, తొడ కండరాలను స్ట్రెచ్ చేయడం అలవాటు చేసుకోవాలి. రోజంతా సరిపడా నీరు తాగాలి. అరటిపండ్లు, ఆకుకూరలు, నట్స్ వంటి పొటాషియం, మెగ్నీషియం అధికంగా ఉండే ఆహారాన్ని తీసుకోవాలి. ఎక్కువ సేపు ఒకేచోట కూర్చోవడం లేదా నిలబడటం వంటివి తగ్గించుకోవాలి. ఈ జాగ్రత్తలు తీసుకున్నా సమస్య తరచుగా వస్తుంటే లేదా నొప్పితో పాటు వాపు, ఎరుపుదనం వంటి లక్షణాలు కనిపిస్తే వైద్యులను సంప్రదించడం ఉత్తమం.