మీ ఫోన్‌లో ఉండాల్సిన 5 ప్రభుత్వ యాప్‌లు ఇవే!

సరికొత్త సాంకేతికతతో భారత ప్రభుత్వ పాలనా వ్యవస్థ డిజిటల్‌గా మారిపోయింది. గుర్తింపు పత్రాల వెరిఫికేషన్ నుంచి బ్యాంక్ బదిలీల వరకు ఎన్నో రకాల పౌర సేవలు ఇప్పుడు మొబైల్ యాప్‌ల ద్వారా వేగంగా అందుతున్నాయి. రోజువారీ జీవితాన్ని సులభతరం చేస్తూ, పారదర్శకతను పెంచే ఐదు ప్రభుత్వ అధికారిక అప్లికేషన్ల వివరాలు చూద్దాం..

ఉమంగ్ యాప్
కేంద్ర ప్రభుత్వం అందిస్తున్న వివిధ సేవలను ఒకే చోటికి చేర్చుతూ ‘ఉమంగ్’ యాప్‌ను రూపొందించారు. ఇందులో ఈపీఎఫ్‌ఓ, పాన్ కార్డ్, గ్యాస్ సిలిండర్ బుకింగ్ వంటి దాదాపు 1000కి పైగా ప్రభుత్వ సేవలను ఒకే వేదిక నుంచి పొందొచ్చు. సామాన్యులకు సైతం ప్రభుత్వ సేవలను సులభంగా, వేగంగా చేరవేయడంలో ఈ అప్లికేషన్ కీలక పాత్ర పోషిస్తోంది.

డిజి యాత్ర
విమాన ప్రయాణాలను మరింత వేగవంతం చేసేందుకు ‘డిజి యాత్ర’ యాప్ ఎంతో ఉపయోగపడుతుంది. ఇది ఫేషియల్ రికగ్నిషన్ సాంకేతికతతో ఎయిర్‌పోర్టుల్లో పేపర్‌లెస్ బోర్డింగ్ సౌకర్యాన్ని కల్పిస్తుంది. విమానాశ్రయాల వద్ద సుదీర్ఘ క్యూ లైన్లలో నిలబడే అవసరం లేకుండా ప్రయాణికులకు ఇది డిజిటల్ గుర్తింపుగా మారుతోంది.

డిజి లాకర్
ఒరిజినల్ డాక్యుమెంట్లు, సర్టిఫికెట్లను వెంటబెట్టుకుని తిరిగే ఇబ్బంది లేకుండా ‘డిజి లాకర్’ సురక్షితమైన క్లౌడ్ స్టోరేజ్ సేవలను అందిస్తోంది. ఇందులో భద్రపరిచే డ్రైవింగ్ లైసెన్స్, విద్యార్హత పత్రాల వంటి డిజిటల్ డాక్యుమెంట్లు చట్టబద్ధంగా చెల్లుబాటు అవుతాయి. భౌతిక పత్రాల వాడకాన్ని తగ్గించి పేపర్‌లెస్ విధానాన్ని ప్రోత్సహించడంలో ఇది అగ్రస్థానంలో నిలిచింది.

ఎం-పరివాహన్
దేశంలోని వాహనదారుల కోసం ‘ఎం-పరివాహన్’ యాప్ ప్రత్యేకంగా అందుబాటులోకి వచ్చింది. దీని ద్వారా వర్చువల్ ఆర్‌సీ, డిజిటల్ డ్రైవింగ్ లైసెన్స్, వాహన రిజిస్ట్రేషన్ వివరాలను ఆర్‌టీఓ కార్యాలయాల చుట్టూ తిరగకుండానే మొబైల్‌లోనే చూసుకోవచ్చు. ట్రాఫిక్ పోలీసులు అడిగినప్పుడు కూడా ఇందులోని డిజిటల్ పత్రాలను నేరుగా చూపించే వెసులుబాటు ఉంది.

భీమ్ యాప్
ఆన్‌లైన్ ఆర్థిక లావాదేవీలను సులభతరం చేసేందుకు ‘భీమ్’ పేమెంట్స్ యాప్ ఎంతగానో తోడ్పడుతోంది. క్యూఆర్ కోడ్ స్కాన్ చేయడం ద్వారా ఒక బ్యాంక్ ఖాతా నుంచి మరో అకౌంట్‌కు తక్షణమే, సురక్షితంగా యూపీఐ బదిలీలు చేసుకోవచ్చు. అయితే ఈ యాప్‌లను డౌన్‌లోడ్ చేసుకునేటప్పుడు మోసపూరిత లింకుల బారిన పడకుండా కేవలం గూగుల్ ప్లే స్టోర్ లేదా యాపిల్ యాప్ స్టోర్‌లనే వాడాలి.