కొనసాగుతున్న అన్నాడీఎంకే కష్టాలు... గుడ్ బై చెప్పిన మరో ఎమ్మెల్యే

తమిళనాడులో అన్నాడీఎంకేలో అంతర్గత సంక్షోభం మరింత ముదురుతోంది. పార్టీలో నెలకొన్న విభేదాలతో ఎమ్మెల్యేల రాజీనామాల పర్వం కొనసాగుతోంది. తాజాగా మంగళవారం నాడు మాజీ మంత్రి, అంబసముద్రం ఎమ్మెల్యే ఈసక్కి సుబ్బయ్య తన పదవికి రాజీనామా చేశారు. ఆయన అసెంబ్లీ ఎన్నికల తర్వాత పార్టీ నుంచి తప్పుకున్న నాలుగో ఎమ్మెల్యే కావడం గమనార్హం. సుబ్బయ్య త్వరలోనే అధికార తమిళగ వెట్రి కళగం (టీవీకే) పార్టీలో చేరతారని ప్రచారం జరుగుతోంది.

స్పీకర్ జేసీడీ ప్రభాకర్‌ను కలిసి సుబ్బయ్య తన రాజీనామా లేఖను సమర్పించారు. తొలుత ఆయన టైప్ చేసిన లేఖను ఇవ్వగా స్పీకర్ నిరాకరించారు. స్వదస్తూరితో రాసిన లేఖను ఇవ్వాలని సూచించారు. దీంతో సుబ్బయ్య వెంటనే చేతితో రాసి రాజీనామా లేఖను అందించగా, దానిని స్పీకర్ ఆమోదించారు.

అసెంబ్లీ ఎన్నికల తర్వాత ఏఐఏడీఎంకేలో విభేదాలు తారాస్థాయికి చేరాయి. పార్టీ ప్రధాన కార్యదర్శి పళనిస్వామి (ఈపీఎస్), సీనియర్ నేత సీవీ షణ్ముగం వర్గాలుగా నేతలు విడిపోయారు. అసెంబ్లీలో జరిగిన విశ్వాస పరీక్ష సమయంలో షణ్ముగం వర్గం టీవీకే ప్రభుత్వానికి మద్దతు పలకగా, ఈపీఎస్ వర్గం తీవ్రంగా వ్యతిరేకించింది. ఈ ఘటనతో పార్టీలో సంక్షోభం మొదలైంది.

సుబ్బయ్య రాజీనామాకు ఒకరోజు ముందే ముగ్గురు ఏఐఏడీఎంకే ఎమ్మెల్యేలు పార్టీని వీడారు. ధరపురం ఎమ్మెల్యే సత్యభామ, పెరుందురై ఎమ్మెల్యే జయకుమార్, మధురాంతకం ఎమ్మెల్యే మరగతం కుమారవేల్ తమ పదవులకు రాజీనామా చేసి, టీవీకే సీనియర్ నేత ఆధవ్ అర్జున సమక్షంలో ఆ పార్టీలో చేరారు.

ఈసక్కి సుబ్బయ్యకు రాజకీయంగా మంచి పట్టుంది. ఆయన 2011, 2021 ఎన్నికల్లోనూ గెలిచారు. గతంలో జయలలిత కేబినెట్‌లో మంత్రిగా కూడా పనిచేశారు. ఇంతటి సీనియర్ నేత పార్టీని వీడటంతో, మరికొందరు ఎమ్మెల్యేలు కూడా ఇదే బాట పట్టవచ్చనే ఊహాగానాలు తమిళ రాజకీయాల్లో జోరందుకున్నాయి.