రామ్ చరణ్ 'పెద్ది' నుంచి లేటెస్ట్ అప్డేట్.. డబ్బింగ్ పూర్తి చేసిన జగ్గూభాయ్

మెగా పవర్ స్టార్ రామ్ చరణ్ హీరోగా, దర్శకుడు బుచ్చిబాబు సానా దర్శకత్వంలో తెరకెక్కుతున్న ప్రతిష్ఠాత్మక చిత్రం 'పెద్ది'. ఈ సినిమాపై ప్రేక్షకుల్లో భారీ అంచనాలు నెలకొని ఉన్నాయి. తాజాగా ఈ చిత్రం నుంచి ఒక ముఖ్యమైన అప్‌డేట్ వెలువడింది. ఈ సినిమాలో అప్పలసూరి అనే కీలక పాత్ర పోషిస్తున్న ప్రముఖ నటుడు జగపతి బాబు తన పాత్రకు సంబంధించిన డబ్బింగ్ పూర్తి చేశారు.

ఈ విషయాన్ని చిత్ర నిర్మాణ సంస్థ వృద్ధి సినిమాస్ తమ 'ఎక్స్' (ట్విట్టర్) ఖాతా ద్వారా అధికారికంగా ప్రకటించింది. "మా జగపతి బాబు గారు అప్పలసూరిగా మారడం చూడండి. 'పెద్ది' కోసం ఆయన తన డబ్బింగ్ పూర్తి చేశారు. జూన్ 4న ప్రపంచవ్యాప్తంగా థియేటర్లలోకి వస్తున్నాం" అంటూ పోస్ట్ చేసింది.

గ్రామీణ నేపథ్యంలో సాగే ఈ యాక్షన్ డ్రామాపై మొదటి నుంచి భారీ ఆసక్తి ఉంది. ఇటీవల విడుదలైన ట్రైలర్ ఈ అంచనాలను మరింతగా పెంచింది. క్రీడలు, భావోద్వేగాల కలబోతగా ఉన్న ఈ ట్రైలర్‌లో రామ్ చరణ్ ఒక బహుముఖ క్రీడాకారుడిగా కనిపించారు. క్రికెట్, రెజ్లింగ్ వంటి క్రీడల్లో రాణిస్తూ, పల్లెటూరిలో అందరి అభిమానం సంపాదించుకునే యువకుడిగా ఆయన పాత్ర ఆకట్టుకుంది. జాన్వీ కపూర్ కథానాయికగా నటించగా, శివ రాజ్‌కుమార్, దివ్యేందు, బోమన్ ఇరానీ వంటి ప్రముఖులు ఇతర ముఖ్య పాత్రల్లో నటించారు. జూన్ 4న ఈ చిత్రం ప్రేక్షకుల ముందుకు రానుంది.