రోడ్లపై నమాజ్ నిషేధం.. కేంద్ర మంత్రి గిరిరాజ్‌ మద్దతు

బహిరంగ ప్రదేశాలు, రోడ్లపై నమాజ్ చేయడాన్ని నిషేధిస్తూ ఉత్తరాఖండ్ ప్రభుత్వం తీసుకున్న నిర్ణయానికి కేంద్ర మంత్రి గిరిరాజ్ సింగ్ శనివారం పూర్తి మద్దతు ప్రకటించారు. మతపరమైన పండుగల సమయంలో శాంతిభద్రతలను కాపాడటానికే అత్యంత ప్రాధాన్యం ఇవ్వాలని పేర్కొన్నారు. ఈ మేరకు ఉత్తరాఖండ్ ముఖ్యమంత్రి పుష్కర్ సింగ్ ధామీని ఆయన ప్రత్యేకంగా అభినందించారు.

కొందరు వ్యక్తులు కావాలనే దేశంలో వాతావరణాన్ని పాడు చేయడానికి ప్రయత్నిస్తున్నారని గిరిరాజ్ సింగ్ మండిపడ్డారు. శాంతిభద్రతల దృష్ట్యా ఇటువంటి నిబంధనలు తెచ్చిన ముఖ్యమంత్రులందరికీ ఆయన ధన్యవాదాలు తెలిపారు. ఇరాన్, అరబ్ దేశాల వీధుల్లో ఇలాంటి పనులు జరగవని, ప్రజల సౌకర్యం కోసమే ఈ నిబంధనలు తెచ్చారని స్పష్టం చేశారు.

పండుగల పేరుతో గోవధ చేయడం, వీధుల్లో బలులు ఇవ్వడంపై కేంద్రమంత్రి తీవ్ర అభ్యంతరం వ్యక్తం చేశారు. ప్రపంచంలోని ఏ ఇతర ముస్లిం దేశాల్లోనూ ఇలాంటి పద్ధతులు ఉండవని తెలిపారు. హిందువుల మనోభావాలను దెబ్బతీయడానికి, వారిని కించపరచడానికే కొందరు ఇలాంటి పనులకు ఒడిగడుతున్నారని ఆరోపించారు. పాకిస్థాన్‌లోనూ హిందువులు గోవులను పూజిస్తారని పేర్కొన్నారు.