‘రుతురాజ్ ఇంకా బాగా ఆడగలడు’.. సీఎస్కే కోచ్ ఫ్లెమింగ్ కీలక వ్యాఖ్యలు
- రుతురాజ్ బ్యాటింగ్పై సీఎస్కే కోచ్ ఫ్లెమింగ్ అసంతృప్తి
- గత సీజన్ల తరహాలో వేగంగా పరుగులు చేయట్లేదని వెల్లడి
- ధోనీ స్థానాన్ని భర్తీ చేయడానికి సమయం పడుతుందని వ్యాఖ్య
- కెప్టెన్గా రుతురాజ్ భవిష్యత్తుపై పూర్తి నమ్మకం ఉందన్న కోచ్
ఐపీఎల్ 2026 ప్లేఆఫ్స్ రేసు నుంచి చెన్నై సూపర్ కింగ్స్ దాదాపు నిష్క్రమించింది. ఈ తరుణంలో ఆ జట్టు కెప్టెన్ రుతురాజ్ గైక్వాడ్ ప్రదర్శనపై హెడ్ కోచ్ స్టీఫెన్ ఫ్లెమింగ్ కీలక వ్యాఖ్యలు చేశాడు. సన్రైజర్స్ హైదరాబాద్తో సోమవారం జరిగిన మ్యాచ్లో రుతురాజ్ 21 బంతుల్లో కేవలం 15 పరుగులు మాత్రమే చేసి నిరాశపరిచాడు.
మ్యాచ్ అనంతరం జరిగిన మీడియా సమావేశంలో ఫ్లెమింగ్ మాట్లాడుతూ.. రుతురాజ్ తన స్థాయికి తగ్గట్టుగా ఆడటం లేదని వ్యాఖ్యానించాడు. పవర్ప్లేలో చెన్నై జట్టు వికెట్లు కోల్పోవడం తీవ్రంగా దెబ్బతీస్తోందని ఫ్లెమింగ్ అంగీకరించాడు.
‘‘రుతురాజ్ ఇంకా మెరుగ్గా ఆడగలడు. గతంలో అతను అద్భుతమైన ఇన్నింగ్స్లు ఆడాడు. కానీ ఈ సీజన్లో అతను తన శైలికి తగ్గ వేగంతో, భారీగా పరుగులు చేయలేకపోతున్నాడు. ఈ లోపాలను అతను కచ్చితంగా సరిదిద్దుకోవాల్సి ఉంటుంది’’ అని స్పష్టం చేశాడు. సంజూ శాంసన్ వంటి ఇతర కెప్టెన్లు పవర్ప్లేను బాగా వాడుకుంటుంటే రుతురాజ్ మాత్రం ఇబ్బంది పడుతున్నాడని పేర్కొన్నాడు.
అయితే రుతురాజ్ కెప్టెన్సీ భవిష్యత్తుపై ఫ్లెమింగ్ పూర్తి విశ్వాసం వ్యక్తం చేశాడు. క్రికెట్ చరిత్రలోనే అత్యుత్తమ కెప్టెన్ అయిన ఎంఎస్ ధోనీ స్థానాన్ని భర్తీ చేయడం ఎవరికైనా అంత సులువు కాదన్నాడు. ఈ మార్పునకు కొంత సమయం పడుతుందని చెప్పాడు. రుతురాజ్ ప్రతిరోజూ కొత్త విషయాలు నేర్చుకుంటున్నాడని, జట్టులోని ఆటగాళ్లందరూ అతన్ని ఎంతో గౌరవిస్తారని తెలిపాడు. భవిష్యత్తులో సీఎస్కే ఫ్రాంచైజీకి రుతురాజ్ ఒక అద్భుతమైన కెప్టెన్గా ఎదుగుతాడనడంలో తనకు ఎలాంటి సందేహం లేదని ధీమా వ్యక్తం చేశాడు.