ప్లేఆఫ్స్‌కు దూసుకెళ్లిన సన్‌రైజర్స్... చెపాక్ లో సీఎస్కే జట్టుకు చెక్

ఐపీఎల్ 2026 సీజన్‌లో సన్‌రైజర్స్ హైదరాబాద్ అద్భుత ప్రదర్శనతో ప్లేఆఫ్స్ బెర్త్‌ను అధికారికంగా ఖరారు చేసుకుంది. సోమవారం నాడు చెన్నైలోని ఎంఏ చిదంబరం స్టేడియంలో చెన్నై సూపర్ కింగ్స్‌తో జరిగిన ఉత్కంఠభరిత మ్యాచ్‌లో 5 వికెట్ల తేడాతో ఘన విజయం సాధించింది. ఇషాన్ కిషన్, హెన్రిచ్ క్లాసెన్‌ల అద్భుత బ్యాటింగ్‌తో ఆరెంజ్ ఆర్మీ మరో ఓవర్ మిగిలి ఉండగానే లక్ష్యాన్ని ఛేదించింది. ఈ ఓటమితో చెన్నై ప్లేఆఫ్స్ అవకాశాలు మరింత సంక్లిష్టంగా మారాయి. మరోవైపు, నేటి మ్యాచ్ ఫలితంతో గుజరాత్ టైటాన్స్ కూడా ప్లేఆఫ్ బెర్తును ఖరారు చేసుకోవడం విశేషం.

181 పరుగుల లక్ష్యంతో బరిలోకి దిగిన సన్‌రైజర్స్‌కు ఆరంభంలోనే ఎదురుదెబ్బ తగిలింది. ట్రావిస్ హెడ్ (6), అభిషేక్ శర్మ (26) త్వరగా వెనుదిరిగారు. అయితే, ఆ తర్వాత క్రీజులోకి వచ్చిన ఇషాన్ కిషన్ (47 బంతుల్లో 70; 7 ఫోర్లు, 3 సిక్సర్లు), హెన్రిచ్ క్లాసెన్ (26 బంతుల్లో 47; 6 ఫోర్లు, 2 సిక్సర్లు) భారీ షాట్లతో చెలరేగారు. వీరిద్దరూ మూడో వికెట్‌కు 75 పరుగుల కీలక భాగస్వామ్యం నెలకొల్పి మ్యాచ్‌ను చెన్నై నుంచి లాగేసుకున్నారు. చివర్లో నితీశ్ రెడ్డి (11), సలీల్ అరోరా (10*) తమ వంతు పరుగులు చేయడంతో సన్‌రైజర్స్ 19 ఓవర్లలోనే విజయాన్ని అందుకుంది.

అంతకుముందు, టాస్ గెలిచి మొదట బ్యాటింగ్ ఎంచుకున్న చెన్నై సూపర్ కింగ్స్ నిర్ణీత 20 ఓవర్లలో 7 వికెట్ల నష్టానికి 180 పరుగుల గౌరవప్రదమైన స్కోరు సాధించింది. డెవాల్డ్ బ్రెవిస్ (27 బంతుల్లో 44), కార్తీక్ శర్మ (19 బంతుల్లో 32) రాణించగా, ఆరంభంలో సంజూ శాంసన్ (13 బంతుల్లో 27) మెరుపులు మెరిపించాడు. అయితే, సన్‌రైజర్స్ కెప్టెన్ ప్యాట్ కమిన్స్ (4 ఓవర్లలో 28 పరుగులిచ్చి 3 వికెట్లు) తన అద్భుత బౌలింగ్‌తో చెన్నైని కట్టడి చేశాడు. అతనికి షకీబ్ హుస్సేన్ (2 వికెట్లు) చక్కటి సహకారం అందించాడు.

గుజరాత్ కూడా..!
ఈ గెలుపుతో సన్‌రైజర్స్ 13 మ్యాచ్‌ల్లో 8 విజయాలు సాధించి, 16 పాయింట్లతో పట్టికలో మూడో స్థానానికి చేరింది. తద్వారా ప్లే ఆఫ్ బెర్తును ఖాయం చేసుకుంది. అదే సమయంలో, 13 మ్యాచ్ లలో 8 విజయాలతో ఉన్న గుజరాత్ టైటాన్స్ బెర్తు కూడా ఖరారైంది. 

మరోవైపు, ఈ ఓటమితో చెన్నై ప్రయాణం కష్టాల్లో పడింది. 13 మ్యాచ్‌ల్లో 6 విజయాలతో 12 పాయింట్లు మాత్రమే సాధించి ఆరో స్థానంలో నిలిచింది. తమ చివరి లీగ్ మ్యాచ్‌లో గెలవడంతో పాటు, పంజాబ్, రాజస్థాన్, ఢిల్లీ జట్ల ఫలితాలపై కూడా ఆధారపడాల్సిన క్లిష్ట పరిస్థితిలో సీఎస్కే చిక్కుకుంది.