లాభాల్లో ఉన్నా.. రూ.100 కోట్ల వ్యాపారానికి అంకుర్‌ వారికూ గుడ్‌బై.. కారణం ఏంటి?

ప్రముఖ ఫిన్‌ఫ్లుయెన్సర్, కంటెంట్ క్రియేటర్ అంకుర్ వారికూ సంచలన నిర్ణయం తీసుకున్నారు. తాను నిర్వహిస్తున్న ఆన్‌లైన్ ఎడ్యుకేషన్ ప్లాట్‌ఫామ్‌ను మూసివేస్తున్నట్లు ప్రకటించారు. గడిచిన ఆరేళ్లుగా ఆర్థికంగా బలంగా ఉండి, భారీ లాభాలు ఆర్జిస్తున్నప్పటికీ, ఈ వ్యాపారాన్ని ఇకపై కొనసాగించడంలో అర్థం లేదని ఆయన సోషల్ మీడియాలో పోస్ట్ చేశారు. ఈ అనూహ్య నిర్ణయం నెటిజన్లను, ఆయన ఫాలోయర్లను ఆశ్చర్యానికి గురిచేసింది.

2020లో ప్రారంభమైన ఈ అప్‌స్కిల్లింగ్ కోర్సుల వ్యాపారం అనూహ్య విజయం సాధించింది. ఈ ప్లాట్‌ఫామ్ ద్వారా ఇప్పటివరకు మొత్తం రూ.100 కోట్ల అమ్మకాలు జరిగాయని, రూ.25 కోట్ల నికర లాభం వచ్చిందని వారికూ స్వయంగా తెలిపారు. "5 లక్షల మంది విద్యార్థులు. 100 కోట్ల అమ్మకాలు. 25 కోట్ల లాభాలు. కానీ, దీన్ని కొనసాగించడంలో అర్థం లేదు" అని ఆయన 'ఎక్స్‌' (ట్విట్టర్)లో రాసుకొచ్చారు. భారీ లాభాలు గడిస్తున్న వ్యాపారాన్ని ఎందుకు మూసివేస్తున్నారనే దానిపై సర్వత్రా ఆసక్తి నెలకొంది.

ఈ నిర్ణయం వెనుక ఉన్న పూర్తి కారణాలు, భవిష్యత్ ప్రణాళికల గురించి ఈరోజు రాత్రి 8:30 గంటలకు ఒక వీడియోలో వివరిస్తానని వారికూ తెలిపారు. దీనికోసం రిమైండర్ సెట్ చేసుకోవాలని తన ఫాలోయర్లను కోరారు. అయితే, ఆయన నిర్ణయం వెనుక ఆర్టిఫిషియల్ ఇంటెలిజెన్స్ (ఏఐ) ప్రభావం ఉందనే ఊహాగానాలు బలపడుతున్నాయి. దీనిపై ఒక యూజర్ ప్రశ్నించగా, వారికూ పరోక్షంగా అంగీకారం తెలిపారు. "దాని ప్రభావం ఉండాలి. ఉంది కూడా" అని సమాధానమిచ్చారు. ఏఐ టూల్స్ కారణంగా విద్య, నైపుణ్యాలు నేర్చుకోవడం మరింత సులభతరం కావడంతో తన కోర్సుల వ్యాపారానికి భవిష్యత్తు ఉండదనే ఆయన ఈ నిర్ణయం తీసుకున్నట్లు విశ్లేషకులు భావిస్తున్నారు.

అంకుర్ వారికూ డిజిటల్ ప్రపంచంలో సుపరిచితుడు. ఆయనకు యూట్యూబ్‌లో 70 లక్షలకు పైగా, ఇన్‌స్టాగ్రామ్‌లో దాదాపు 40 లక్షల మంది ఫాలోయర్లు ఉన్నారు. వారికూ ప్రకటనపై సోషల్ మీడియాలో మిశ్రమ స్పందన వ్యక్తమవుతోంది. కొత్త వ్యాపారాన్ని ప్రారంభించేందుకే ఈ హైప్ క్రియేట్ చేస్తున్నారని కొందరు విమర్శిస్తున్నారు. "ఇప్పటికే రూ.100 కోట్లు సంపాదించాక, వ్యాపారం కొనసాగించడంలో అర్థం లేదనడం కరెక్టే" అని మరికొందరు వ్యంగ్యంగా కామెంట్లు పెడుతున్నారు. మొత్తం మీద ఆయన తదుపరి ప్రకటన కోసం అందరూ ఆసక్తిగా ఎదురుచూస్తున్నారు.