పుట్టపర్తిలో ఏఎంసీఏ ప్రాజెక్టుకు శంకుస్థాపన.. సత్యసాయి బాబా మహాసమాధిని దర్శించుకున్న మంత్రి లోకేశ్

శ్రీ సత్యసాయి జిల్లా పుట్టపర్తిలో రక్షణ రంగ అభివృద్ధిలో ఒక చరిత్రాత్మక ఘట్టానికి అంకురార్పణ జరిగింది. ఐదో తరం అడ్వాన్స్‌డ్ మీడియం కంబాట్ ఎయిర్‌క్రాఫ్ట్ (AMCA) తయారీ కేంద్రానికి ముఖ్యమంత్రి నారా చంద్రబాబు నాయుడు, కేంద్ర రక్షణ శాఖ మంత్రి రాజ్‌నాథ్ సింగ్ కలిసి శుక్రవారం ఉదయం 10:15 గంటలకు శంకుస్థాపన చేశారు. రూ.15,803 కోట్ల భారీ వ్యయంతో ఈ ప్రాజెక్టును ఏర్పాటు చేస్తుండగా, దీని ద్వారా సుమారు 7,500 మందికి ప్రత్యక్షంగా, పరోక్షంగా ఉపాధి అవకాశాలు లభించనున్నాయి.

ఈ కీలక కార్యక్రమంలో భాగంగా ఏఎంసీఏ ఇంటిగ్రేషన్, ఫ్లైట్ టెస్టింగ్ సెంటర్, ఏరోనాటికల్ డెవలప్‌మెంట్ ఏజెన్సీలతో పాటు మరికొన్ని డిఫెన్స్, డ్రోన్ ప్రాజెక్టులకు కూడా వీరిద్దరూ శంకుస్థాపన చేశారు. ఈ కార్యక్రమం కోసం ముఖ్యమంత్రి చంద్రబాబు శుక్రవారం ఉదయం పుట్టపర్తికి బయలుదేరి వెళ్లారు. రాయలసీమ ప్రాంత అభివృద్ధికి ఈ ప్రాజెక్టులు కీలకం కానున్నాయని ప్రభుత్వం భావిస్తోంది.

ఇదే జిల్లాలో రెండో రోజు పర్యటిస్తున్న ఐటీ, విద్యాశాఖ మంత్రి నారా లోకేష్ కూడా ఈ శంకుస్థాపన కార్యక్రమంలో పాల్గొన్నారు. అంతకుముందు ఉదయం ఆయన పుట్టపర్తిలోని ప్రశాంతి నిలయాన్ని సందర్శించారు. అక్కడ సత్యసాయి సెంట్రల్ ట్రస్ట్ నిర్వాహకులు ఆయనకు సాదర స్వాగతం పలికారు. అనంతరం సాయి కుల్వంత్ మందిరంలోని శ్రీ భగవాన్ సత్యసాయి బాబా మహాసమాధిని దర్శించుకున్నారు. లోకేష్ వెంట మంత్రులు పయ్యావుల కేశవ్, అనగాని సత్యప్రసాద్, ఎమ్మెల్యే ఎంఎస్ రాజు, టీడీపీ నేత బీవీ రాముడు తదితరులు ఉన్నారు.

పుట్టపర్తిలో కార్యక్రమం ముగిసిన అనంతరం ముఖ్యమంత్రి చంద్రబాబు అమరావతికి తిరిగి పయనం కానున్నారు. మధ్యాహ్నం 3:30 గంటలకు పోలవరం ప్రాజెక్టు నిర్వాసితులతో ఆయన సమావేశమవుతారు. ఈ సందర్భంగా నిర్వాసితులకు అందాల్సిన పరిహారాన్ని సీఎం స్వయంగా అందజేయనున్నారు. ఒకే రోజు అటు అభివృద్ధి, ఇటు సంక్షేమ కార్యక్రమాలపై సీఎం దృష్టి సారించడం ప్రాధాన్యత సంతరించుకుంది.