విజయ్ ప్రమాణ స్వీకారం వేళ త్రిషనే కాదు... ఈ బిలియనీర్ మహిళ కూడా టాక్ ఆఫ్ ద టౌన్ అయింది!

ద్రవిడ పార్టీల కంచుకోట అయిన తమిళనాడులో ఒక కొత్త రాజకీయ శకం ఆరంభమైంది. ప్రముఖ నటుడు, రాజకీయ నేత విజయ్ రాష్ట్ర ముఖ్యమంత్రిగా ప్రమాణ స్వీకారం చేసి, తమిళ రాజకీయాల్లో సరికొత్త అధ్యాయానికి నాంది పలికారు. ఈ చరిత్రాత్మక ఘట్టాన్ని వీక్షించడానికి తమిళనాడులోని సినీ, రాజకీయ, వ్యాపార రంగాలకు చెందిన ప్రముఖులందరూ తరలివచ్చారు.

అందరి దృష్టిని ఆకర్షించిన త్రిష
ఈ కార్యక్రమం మొత్తంలో అందరి దృష్టిని ఆకర్షించిన వ్యక్తి నటి త్రిష. మంత్రులు, ఎమ్మెల్యేలు, వారి కుటుంబ సభ్యులతో పాటు ముందు వరుసలో విజయ్ తల్లిదండ్రులు ఎస్.ఏ. చంద్రశేఖర్, శోభ పక్కన ఆమె కూర్చున్నారు. విజయ్ ఖాళీ చేసిన తిరుచ్చి నియోజకవర్గం నుంచి త్రిష పోటీ చేయవచ్చని కొంతకాలంగా సాగుతున్న ఊహాగానాలకు ఆమె రాక మరింత బలాన్నిచ్చింది. దీంతో అక్కడున్న కెమెరాలన్నీ ఆమె వైపే తిరిగాయి.

ఆసక్తికర దృశ్యం ఆవిష్కృతమైన వేళ‌..!
ఇదే వేదికపై మరో ఆసక్తికర దృశ్యం ఆవిష్కృతమైంది. ఆధవ్ అర్జున మంత్రిగా ప్రమాణ స్వీకారం చేస్తుండగా, ప్రేక్షకుల మధ్యలో ఉన్న ఆయన భార్య, బిలియనీర్ వ్యాపారవేత్త డేజీ మార్టిన్ భావోద్వేగానికి గురయ్యారు. ఆనందంతో కన్నీళ్లు పెట్టుకుంటూ చప్పట్లు కొడుతున్న ఆమె దృశ్యాలు అందరినీ ఆకట్టుకున్నాయి. డేజీ, ప్రముఖ లాటరీ కింగ్ శాంటియాగో మార్టిన్ కుటుంబానికి చెందినవారు. ఆమె తల్లి లీమా రోజ్ మార్టిన్ ప్రస్తుత తమిళనాడు అసెంబ్లీలో అత్యంత సంపన్న ఎమ్మెల్యే కావడం గమనార్హం.

ఒకప్పుడు పేద కుటుంబంలో పుట్టి బాస్కెట్‌బాల్ క్రీడాకారుడిగా రాణించిన ఆధవ్ అర్జున ప్రస్థానం ఒక సినిమా కథను తలపిస్తుంది. అత్యంత సంపన్న కుటుంబానికి చెందిన అమ్మాయిని పెళ్లి చేసుకున్నప్పుడు ఎన్నో విమర్శలు ఎదుర్కొన్నారు. "నాలాంటి వాడు ధనిక కుటుంబానికి చెందిన అమ్మాయిని ఎందుకు పెళ్లి చేసుకోకూడదు?" అని ఆయన ఆనాడు గట్టిగా ప్రశ్నించారు. ప్రస్తుతం సీఎం విజయ్ తర్వాత, తమిళనాడు రాజకీయాల్లో అత్యంత సంపన్నుడిగా ఆధవ్ నిలిచారు.

ఆధవ్‌పై ఆయన బావమరిది చేసిన సంచలన ఆరోపణలు చర్చనీయాంశం
అయితే, ఆధవ్ ఎదుగుదల వివాదాల నడుమ సాగుతోంది. ఆయనకు పలువురు మహిళలతో సంబంధాలు ఉన్నాయని, వారికి రోల్స్ రాయిస్ కార్లను బహుమతిగా ఇచ్చారని డేజీ సొంత సోదరుడు జోసెఫ్ చార్లెస్ మార్టిన్ బహిరంగంగా ఆరోపణలు చేశారు. సొంత కుటుంబం నుంచే వస్తున్న ఈ ఆరోపణలు, ఈ ఉత్సవ వాతావరణంలో కలకలం రేపాయి.