చీర లాగారు.. తోసి పడేశారు.. రైలులో వృద్ధురాలైన వ్యాపారిపై సిబ్బంది అమానుషం.. వీడియో ఇదిగో!

రైలులో ప్రయాణిస్తున్న ఓ వృద్ధురాలైన వ్యాపారిని రైల్వే సిబ్బంది వేధిస్తున్న వీడియో ఒకటి సామాజిక మాధ్యమాల్లో వైరల్ అవుతోంది. ఈ ఘటనకు బాధ్యులైన వారిపై కఠిన చర్యలు తీసుకోవాలని నెటిజన్లు డిమాండ్ చేస్తున్నారు.

రియా ఘోష్ అనే ఎక్స్ యూజర్ పోస్ట్ చేసిన ఈ క్లిప్‌లో ఓ వృద్ధురాలు రైలు కంపార్ట్‌మెంట్‌లో చేతులు జోడించి నిస్సహాయంగా నేలపై కూర్చొని ఉండటం కనిపించింది. రైల్వే సిబ్బంది ఆమెతో దురుసుగా ప్రవర్తించగా, సిబ్బంది ఒకరు ఆమెను తోసి పడేయడం, మరో సందర్భంలో ఆమె చీరను పట్టుకుని లాగడం వీడియోలో కనబడుతోంది. అయితే, ఈ వేధింపులకు అసలు కారణం ఏమిటనేది ఇంకా తెలియరాలేదు.

వృద్ధురాలు అంతటి క్షోభ అనుభవిస్తున్నా చుట్టూ ఉన్న ప్రయాణికులు మౌనంగా చూస్తూ ఉండిపోవడం వీడియోలో స్పష్టంగా ఉంది. "75 ఏళ్ల వృద్ధురాలిని ఐఆర్‌సీటీసీ సిబ్బంది బహిరంగంగా అవమానించారు. చుట్టూ ఉన్న జనం మౌనంగా చూశారు. ధైర్యం, కరుణపై భయం గెలిచినప్పుడు మానవత్వం చచ్చిపోతుంది" అని రియా ఘోష్ తన పోస్ట్‌లో ఆవేదన వ్యక్తం చేశారు.

ఈ వీడియో వైరల్ కావడంతో నెటిజన్ల నుంచి తీవ్ర ఆగ్రహం వ్యక్తమవుతోంది. ఈ సంఘటన ‘సిగ్గుచేటు’, ‘హృదయవిదారకం’ అంటూ కామెంట్లు పెడుతున్నారు. "ఇలాంటి నీచమైన చర్యలు నాగరిక సమాజానికి తగవు. వారిని కఠినంగా శిక్షించాలి" అని ఒక యూజర్ పేర్కొన్నారు. పొట్టకూటి కోసం పనిచేసే వృద్ధురాలిని కాపాడలేని ప్రయాణికులను కూడా పలువురు విమర్శించారు.

ఈ ఘటన ఎక్కడ, ఎప్పుడు జరిగిందనే దానిపై ఇంకా స్పష్టత రాలేదు. వీడియో వైరల్ కావడంతో రైల్వే సేవ స్పందించింది. ఈ విషయంపై విచారణ జరుపుతున్నామని, పూర్తి వివరాలు వెల్లడిస్తామని తెలిపింది.