నీట్ 'గెస్ పేపర్' కలకలం.. దర్యాప్తు ముమ్మరం చేసిన రాజస్థాన్ ఎస్‌వోజీ

వైద్య విద్య ప్రవేశాల కోసం నిర్వహించిన నీట్-యూజీ 2026 పరీక్షలో భారీ అక్రమాలు జరిగాయన్న ఆరోపణలు దేశవ్యాప్తంగా తీవ్ర కలకలం రేపుతున్నాయి. పరీక్షకు ముందే 'గెస్ పేపర్' పేరిట కొందరు విద్యార్థులకు ప్రశ్నపత్రం అందిందన్న ఆరోపణలపై రాజస్థాన్ పోలీస్ స్పెషల్ ఆపరేషన్స్ గ్రూప్ (ఎస్‌వోజీ) దర్యాప్తు ప్రారంభించింది. ఈ కేసుకు సంబంధించి రాజస్థాన్, ఉత్తరాఖండ్‌లలో మొత్తం 13 మంది అనుమానితులను అదుపులోకి తీసుకుని విచారిస్తున్నారు.

ఎస్‌వోజీ ఏడీజీపీ విశాల్ బన్సల్ వెల్లడించిన వివరాల ప్రకారం, "పరీక్షకు దాదాపు నెల రోజుల ముందే 410 ప్రశ్నలతో కూడిన ఒక 'గెస్ పేపర్' సర్క్యులేట్ అయింది. అందులోని కెమిస్ట్రీ విభాగానికి చెందిన సుమారు 120 ప్రశ్నలు, అసలు నీట్ పరీక్ష పేపర్‌లోని ప్రశ్నలతో సరిపోలినట్లు ప్రాథమికంగా గుర్తించాం" అని తెలిపారు. ఈ గెస్ పేపర్‌ను రూ.30,000 నుంచి రూ.5 లక్షల వరకు అమ్ముకున్నట్లు ఆరోపణలు వస్తున్నాయి. కేరళలో చదువుతున్న చురు జిల్లాకు చెందిన ఓ మెడికల్ విద్యార్థి ద్వారా ఈ పేపర్ రాజస్థాన్‌లోని కోచింగ్ సెంటర్లకు చేరినట్లు అధికారులు అనుమానిస్తున్నారు.

మరోవైపు, నేషనల్ టెస్టింగ్ ఏజెన్సీ (ఎన్‌టీఏ) ఈ ఆరోపణలపై స్పందించింది. తమకు మే 7న దీనిపై సమాచారం అందిందని, వెంటనే కేంద్ర ఏజెన్సీలకు విచారణ కోసం అప్పగించామని తెలిపింది. అయితే, దీనిని అధికారికంగా 'పేపర్ లీక్' అని ధ్రువీకరించలేదు. పటిష్ఠ భద్రత మధ్యే పరీక్ష నిర్వహించామని స్పష్టం చేసింది. ఈ వివాదం కొనసాగుతుండగానే, ఎన్‌టీఏ తాజాగా నీట్ ప్రొవిజనల్ ఆన్సర్ కీని విడుదల చేయడం గమనార్హం. ప్రస్తుతం ఎస్‌వోజీ బృందాలు ఈ కేసులో లోతుగా దర్యాప్తు చేస్తున్నాయి.