రామసేతు మార్గంలో అద్భుతం.. శ్రీలంక నుంచి భారత్‌కు ఈదిన బెంగళూరు జంట.. వీడియో ఇదిగో!

బెంగళూరుకు చెందిన ఓ జంట అరుదైన సాహసంతో వార్తల్లో నిలిచింది. చారిత్రక రామసేతు మార్గంలో శ్రీలంక నుంచి భారత్‌కు ఏకధాటిగా ఈది అందరినీ ఆశ్చర్యపరిచింది. డానిష్ అబ్ది, వృశాలి ప్రసాదె అనే ఈ దంపతులు 10 గంటల 45 నిమిషాల్లో ఈ కఠినమైన లక్ష్యాన్ని పూర్తి చేశారు.

శ్రీలంకలోని తలైమన్నార్ వద్ద తమ ఈతను ప్రారంభించిన ఈ జంట, భారత్‌లోని ధనుష్కోడి తీరానికి చేరుకున్నారు. ఈ సుదీర్ఘ ప్రయాణంలో బలమైన సముద్ర ప్రవాహాలు, అలలు, తీవ్రమైన అలసట వంటి ఎన్నో సవాళ్లను అధిగమించారు. వీరి భద్రత కోసం సహాయక బృందాలు, పారామెడికల్ సిబ్బంది, కోస్ట్ గార్డ్ బృందాలు వీరిని వెన్నంటి పర్యవేక్షించాయి.

తీరానికి చేరిన వెంటనే ఈ జంట తమ ఆనందాన్ని ఇన్‌స్టాగ్రామ్‌లో పంచుకుంది. "మేం సాధించాం! శ్రీలంక నుంచి భారత్ వరకు 10 గంటల 45 నిమిషాల కఠిన ప్రయాణం. 12 గంటలపాటు అలారం లేకుండా నిద్రపోయాక మరిన్ని వివరాలు చెబుతాం" అని సరదాగా పోస్ట్ చేశారు. దీంతో నెటిజన్లు వారిపై ప్రశంసల వర్షం కురిపిస్తున్నారు.

మణిపాల్ హాస్పిటల్స్ సహకారంతో ఈ కార్యక్రమం జరిగింది. కేవలం సాహస యాత్రగానే కాకుండా, భారత్-శ్రీలంక మధ్య ఉన్న చారిత్రక, సాంస్కృతిక సంబంధాలకు ప్రతీకగా ఈ ప్రయత్నం చేపట్టినట్లు నిర్వాహకులు తెలిపారు. నియంత్రిత వాతావరణంలో కాకుండా, అనూహ్యంగా మారే సముద్ర పరిస్థితుల మధ్య ఈత కొట్టడం వీరి సంకల్పానికి నిదర్శనం.