పినరయి విజయన్ సోషల్ మీడియా ఖాతాలో మార్పులు.. ఓటమికి సంకేతమా?

కేరళ అసెంబ్లీ ఎన్నికల ఓట్ల లెక్కింపునకు కొన్ని గంటల సమయం మాత్రమే మిగిలి ఉన్న తరుణంలో ఆ రాష్ట్ర ముఖ్యమంత్రి పినరయి విజయన్ తన సోషల్ మీడియా ఖాతాల్లో చేసిన మార్పులు రాజకీయ వర్గాల్లో తీవ్ర చర్చకు దారితీశాయి. ఆయన తన అధికారిక ఖాతాల నుంచి 'ముఖ్యమంత్రి' అనే హోదాను తొలగించారు.

ఎన్నికల ఫలితాలు వెలువడటానికి దాదాపు 12 గంటల ముందు ఈ మార్పు చోటుచేసుకోవడం గమనార్హం. ఎక్స్ (ట్విట్టర్) ఖాతాలో 'చీఫ్ మినిస్టర్' అనే హోదా స్థానంలో 'కమ్యూనిస్ట్ పార్టీ ఆఫ్ ఇండియా (మార్క్సిస్ట్) పొలిట్‌బ్యూరో సభ్యుడు' అని ఆయన మార్చుకున్నారు. ఈ అనూహ్య పరిణామం కేరళ రాజకీయాల్లో ఉత్కంఠను మరింత పెంచింది.

ఈ మార్పులపై సోషల్ మీడియాలో నెటిజన్లు భిన్న రకాలుగా స్పందిస్తున్నారు. "పినరయి విజయన్ ఫలితాలను ముందే పసిగట్టారా?", "ఓటమిని అంగీకరించి హోదా మార్చారా?" అంటూ పలువురు కామెంట్లు చేస్తున్నారు. అధికారంలో ఉన్న ఎల్‌డీఎఫ్ కూటమి ఓటమి ఖాయమని తెలియడంతోనే విజయన్ ఈ నిర్ణయం తీసుకున్నారంటూ ఊహాగానాలు మొదలయ్యాయి.

సాధారణంగా ఎన్నికల ఫలితాలు వెలువడి, కొత్త ప్రభుత్వం ఏర్పడే వరకు నేతలు తమ హోదాలను మార్చుకోరు. అయితే, విజయన్ అందుకు భిన్నంగా వ్యవహరించడం ఇప్పుడు కేరళతో పాటు దేశవ్యాప్తంగా హాట్ టాపిక్‌గా మారింది. మరికొన్ని గంటల్లో వెలువడనున్న ఫలితాలతో ఈ చర్చలకు తెరపడనుంది.