మిలమిలలాడే దంతాల కోసం... నేచురల్ గా...!

అందమైన నవ్వు కోసం దంతాలను తెల్లగా మార్చుకోవాలని చాలామంది ఆశిస్తారు. అయితే, మార్కెట్లో దొరికే ఉత్పత్తుల్లో రసాయనాలు ఉంటాయని ఆందోళన చెందుతారు. అలాంటి వారి కోసం కొన్ని సహజ పద్ధతులు అందుబాటులో ఉన్నాయి. ఆయిల్ పుల్లింగ్, బేకింగ్ సోడా వంటి వాటితో ఇంట్లోనే సురక్షితంగా దంతాలను తెల్లగా చేసుకోవచ్చని నిపుణులు చెబుతున్నారు.

సహజ పద్ధతులు ఇవే..
భారతీయ సంప్రదాయ పద్ధతి అయిన ఆయిల్ పుల్లింగ్ నోటిలోని బ్యాక్టీరియాను తగ్గించి ప్లాక్‌ను నివారిస్తుంది. రోజూ కొబ్బరి నూనెతో ఇలా చేయడం వల్ల మంచి ఫలితం ఉంటుందని నిపుణులు చెబుతున్నారు. అలాగే, వంట సోడా (బేకింగ్ సోడా) కూడా సహజమైన బ్లీచింగ్ ఏజెంట్‌గా పనిచేస్తుంది. నీటితో కలిపిన బేకింగ్ సోడా పేస్ట్‌తో వారానికి రెండుసార్లు బ్రష్ చేయడం వల్ల పళ్లపై మచ్చలు క్రమంగా తొలగిపోతాయి. హైడ్రోజన్ పెరాక్సైడ్‌ను నీటితో కలిపి మౌత్‌వాష్‌గా వాడొచ్చు, కానీ దీనిని పరిమితంగా, జాగ్రత్తగా వాడాలి.

నివారణ మార్గాలు
దంతాలు పసుపు రంగులోకి మారకుండా ఉండాలంటే కొన్ని జాగ్రత్తలు తీసుకోవాలి. కాఫీ, టీ, రెడ్ వైన్ వంటి పానీయాలను పరిమితం చేయాలి. ధూమపానం, పొగాకు ఉత్పత్తులకు దూరంగా ఉండాలి. చక్కెర ఎక్కువగా ఉండే ఆహార పదార్థాలను తగ్గించడం వల్ల నోటిలో బ్యాక్టీరియా వృద్ధిని అరికట్టవచ్చు. పాలు, చీజ్ వంటి కాల్షియం అధికంగా ఉండే ఆహారం తీసుకోవడం వల్ల దంతాల ఎనామెల్ బలపడుతుంది.

అయితే, ఈ సహజ పద్ధతులు ఎంతమాత్రం రోజూ చేసే బ్రషింగ్‌కు ప్రత్యామ్నాయం కాదని గుర్తుంచుకోవాలి. దంత వైద్యుల సూచనల ప్రకారం, రోజుకు రెండుసార్లు బ్రష్ చేయడం తప్పనిసరి. ఏవైనా దంత సమస్యలు ఉంటే నిపుణులైన వైద్యులను సంప్రదించడం ఉత్తమం.