సీపీఐ రామకృష్ణకు మాతృవియోగం.. లోకేశ్ సంతాపం

భారత కమ్యూనిస్టు పార్టీ (సీపీఐ) జాతీయ కార్యదర్శి కె. రామకృష్ణ ఇంట్లో విషాదం నెలకొంది. ఆయన మాతృమూర్తి గౌరమ్మ (100) కన్నుమూశారు. కర్నూలు జిల్లా, ఆలూరు మండలంలోని వారి స్వగ్రామం మోలగవల్లిలో ఆమె తుదిశ్వాస విడిచారు. వయసు పైబడటంతో గత కొంతకాలంగా ఆమె అనారోగ్యంతో ఉన్నట్లు తెలుస్తోంది. శతాధిక వయసులో గౌరమ్మ మరణించడంతో ఆమె కుటుంబంలో తీవ్ర విషాదం అలముకుంది.

రామకృష్ణ మాతృమూర్తి మృతి పట్ల తెలుగుదేశం పార్టీ జాతీయ వర్కింగ్ ప్రెసిడెంట్ నారా లోకేశ్ సంతాపం తెలిపారు. ఈ మేరకు ఆయన ఒక ప్రకటన విడుదల చేశారు. రామకృష్ణ కుటుంబ సభ్యులకు తన ప్రగాఢ సానుభూతిని తెలియజేశారు.

"సీపీఐ జాతీయ కార్య‌ద‌ర్శి రామ‌కృష్ణ గారి మాతృమూర్తి గౌర‌మ్మ గారి మృతి ప‌ట్ల సంతాపం తెలియ‌జేస్తున్నాను. ఆమె స్మృతిలో నివాళులు అర్పిస్తూ, ఆత్మ‌కు శాంతి చేకూరాల‌ని ప్రార్థిస్తున్నాను. కుటుంబ‌స‌భ్యుల‌కు నా ప్రగాఢ సానుభూతి," అని లోకేశ్ పేర్కొన్నారు.