హీరో అజిత్ మోటార్‌స్పోర్ట్స్ జర్నీపై సినిమా.. ‘గ్లాడియేటర్స్’గా పేరు ఖరారు

తమిళ స్టార్ హీరో అజిత్ కుమార్ మోటార్‌స్పోర్ట్ ప్రయాణం ఆధారంగా ఓ డాక్యుమెంటరీ ఫిల్మ్ తెరకెక్కుతున్న విషయం తెలిసిందే. తాజాగా ఈ చిత్రానికి 'గ్లాడియేటర్స్' అనే టైటిల్‌ను ఖరారు చేసినట్లు చిత్రబృందం ప్రకటించింది. ఏఎల్ విజయ్ దర్శకత్వం వహిస్తున్న ఈ సినిమాను త్వరలోనే థియేటర్లలో విడుదల చేయనున్నట్లు తెలిపింది. వాస్తవానికి మే 1న అజిత్ పుట్టినరోజు సందర్భంగా ఈ సినిమాను విడుదల చేయాలని భావించినా, అది సాధ్యపడలేదు.

ఈ చిత్రానికి జాతీయ అవార్డు గ్రహీత, ప్రముఖ సంగీత దర్శకుడు జీవీ ప్రకాశ్ కుమార్ సంగీతం అందిస్తున్నారు. ఈ సందర్భంగా ఆయన 'గ్లాడియేటర్స్' గ్లింప్స్ వీడియోను సోషల్ మీడియాలో పంచుకున్నారు. "అసాధ్యాన్ని ఛేదిద్దాం.. రేస్ త్వరలో మొదలవుతుంది" అంటూ అజిత్ రేసింగ్ కోసం ప్రత్యేక థీమ్ మ్యూజిక్ అందిస్తున్నట్లు పేర్కొన్నారు.

సుమారు 90 నిమిషాల నిడివితో రానున్న ఈ డాక్యు-ఫిల్మ్‌ను రెండు భాగాలుగా థియేటర్లలో విడుదల చేయనున్నారు. దేశంలో మోటార్‌స్పోర్ట్‌ను చాలామంది సంపన్నుల క్రీడగా భావిస్తారని, ఆ అపోహను తొలగించి యువతకు స్ఫూర్తినిచ్చేందుకే ఈ చిత్రాన్ని రూపొందిస్తున్నట్లు గతంలోనే చిత్ర వర్గాలు తెలిపాయి. థియేట్రికల్ విడుదల తర్వాత ఓటీటీలో ఎక్స్‌టెండెడ్ వెర్షన్‌ను రిలీజ్ చేసే ఆలోచనలో ఉన్నారు.

ఈ డాక్యు-ఫిల్మ్ కోసం మలేషియాలో జరిగిన రేసులు, వ్యూహాత్మక సమావేశాలు, ప్రాక్టీస్ సెషన్లతో పాటు అజిత్ సన్నద్ధతను దర్శకుడు విజయ్ చిత్రీకరించారు. కాగా, గతేడాది అజిత్ కుమార్ ఇటలీలోని వెనిస్‌లో 'జెంటిల్‌మన్ డ్రైవర్ ఆఫ్ ది ఇయర్ 2025' అవార్డును అందుకున్నారు. తన రేసింగ్ టీమ్‌కు యజమానిగా ఉండటమే కాకుండా, స్వయంగా రేసుల్లో పాల్గొంటూ తన అభిరుచిని చాటుకుంటున్నారు.