సన్‌రైజర్స్ హైదరాబాద్ టీమ్ లోకి అండర్-19 వరల్డ్ కప్ హీరో

ఐపీఎల్ 2026 సీజన్‌లో అద్భుత ప్రదర్శనతో దూసుకెళుతున్న సన్‌రైజర్స్ హైదరాబాద్ (ఎస్‌ఆర్‌హెచ్) జట్టులో మరో మార్పు చోటుచేసుకుంది. గాయం కారణంగా పేసర్ శివమ్ మావి ఈ సీజన్‌కు దూరమయ్యాడు. అతని స్థానంలో యువ ఆల్‌రౌండర్ ఆర్ఎస్ అంబరీష్‌ను రీప్లేస్‌మెంట్‌గా తీసుకున్నట్లు ఫ్రాంచైజీ ప్రకటించింది. గజ్జల్లో గాయంతో మావి టోర్నీ నుంచి వైదొలగగా, రూ.30 లక్షలకు అంబరీష్‌ను జట్టులోకి తీసుకున్నట్లు ఐపీఎల్ నిర్వాహకులు శుక్రవారం ఓ ప్రకటనలో తెలిపారు.

చెన్నైకి చెందిన అంబరీష్, ఈ ఏడాది జరిగిన అండర్-19 ప్రపంచకప్‌లో భారత్ విజయంలో కీలక పాత్ర పోషించాడు. కుడిచేతి వాటం మీడియం పేసర్, ఎడమచేతి వాటం బ్యాటర్ అయిన అంబరీష్, ఆ టోర్నీలో 11 వికెట్లు పడగొట్టి భారత్ తరఫున అత్యధిక వికెట్లు తీసిన బౌలర్‌గా నిలిచాడు. బ్యాట్‍తో, బంతితో రాణించగల సత్తా ఉండటంతో అతడిని భవిష్యత్ స్టార్‌గా పరిగణిస్తున్నారు.

ఈ సీజన్‌లో సన్‌రైజర్స్‌ జట్టును గాయాల సమస్య వెంటాడుతోంది. ఇప్పటికే పేస్ బౌలింగ్ విభాగాన్ని బలోపేతం చేసేందుకు పలువురు ఆటగాళ్లను రీప్లేస్‌మెంట్‌గా తీసుకుంది. జాక్ ఎడ్వర్డ్స్ స్థానంలో డేవిడ్ పేన్‌ను, ఆ తర్వాత అతను గాయపడటంతో గెరాల్డ్ కోయెట్జీని తీసుకుంది. మరోవైపు, బ్రైడన్ కార్స్ గాయంతో దూరమవడంతో శ్రీలంక పేసర్ దిల్షాన్ మధుశంకను జట్టులోకి చేర్చుకుంది.

ప్రస్తుతం సన్‌రైజర్స్ వరుసగా ఐదు మ్యాచ్‌లలో గెలిచి పాయింట్ల పట్టికలో మూడో స్థానంలో కొనసాగుతోంది. ఆదివారం నాడు ఉప్పల్‌లోని రాజీవ్ గాంధీ అంతర్జాతీయ స్టేడియంలో కోల్‌కతా నైట్ రైడర్స్‌తో తలపడనుంది.