మస్క్ తొలగించిన పరాగ్ అగర్వాల్ గ్రాండ్ కమ్‌బ్యాక్.. ఇప్పుడు 19,000 కోట్ల కంపెనీకి బాస్!

ట్విట్టర్ (ప్రస్తుతం ఎక్స్) మాజీ సీఈఓ పరాగ్ అగర్వాల్, టెక్ ప్రపంచంలోకి మరోసారి తనదైన శైలిలో గ్రాండ్ రీఎంట్రీ ఇచ్చారు. ఆయన స్థాపించిన ఆర్టిఫిషియల్ ఇంటెలిజెన్స్ (ఏఐ) స్టార్టప్ 'పారలల్ వెబ్ సిస్టమ్స్' (Parallel Web Systems), తాజాగా సమీకరించిన నిధులతో ఏకంగా 2 బిలియన్ డాలర్ల (సుమారు రూ.19,020 కోట్లు) విలువను అందుకుంది. ఎలాన్ మస్క్ ఆదేశాలతో ట్విట్టర్ సీఈఓ పదవిని కోల్పోయిన తర్వాత, పరాగ్ అగర్వాల్ సాధించిన ఈ విజయం ఇప్పుడు టెక్ వర్గాల్లో హాట్ టాపిక్‌గా మారింది.

టెక్‌క్రంచ్ కథనం ప్రకారం.. ఈ స్టార్టప్ సిరీస్ బి ఫండింగ్ రౌండ్‌లో 100 మిలియన్ డాలర్ల (సుమారు రూ.951 కోట్లు) నిధులను సమీకరించింది. ప్రముఖ వెంచర్ క్యాపిటల్ సంస్థ సీక్వోయా క్యాపిటల్ ఈ రౌండ్‌కు నాయకత్వం వహించింది. ఇప్పటికే ఈ కంపెనీలో పెట్టుబడులు పెట్టిన క్లీనర్ పెర్కిన్స్, ఇండెక్స్ వెంచర్స్, ఖోస్లా వెంచర్స్ వంటి సంస్థలు కూడా తాజా రౌండ్‌లో పాల్గొన్నాయి. కేవలం ఐదు నెలల క్రితమే ఈ సంస్థ సిరీస్ ఏ రౌండ్‌లో 100 మిలియన్ డాలర్ల నిధులు సేకరించి, 740 మిలియన్ డాలర్ల విలువను సాధించడం గమనార్హం. 

పారలల్ వెబ్ సిస్టమ్స్ సంస్థ, ఏఐ ఏజెంట్ల కోసం ప్రత్యేకంగా రూపొందించిన టూల్స్‌ను అభివృద్ధి చేస్తోంది. ఆటోమేటెడ్ సిస్టమ్స్ కోసం వెబ్ సెర్చ్, రీసెర్చ్ ఏపీఐలను ఇది అందిస్తుంది. ఇప్పటికే నోషన్, ఓపెన్‌డోర్, క్లే, హార్వే వంటి ప్రముఖ కంపెనీలు దీని సేవలను వినియోగించుకుంటున్నాయి. పలు బ్యాంకులు, హెడ్జ్ ఫండ్‌లు కూడా తమ క్లయింట్లుగా ఉన్నాయని కంపెనీ చెబుతోంది. లక్షకు పైగా డెవలపర్లు తమ ప్లాట్‌ఫామ్‌ను ఉపయోగిస్తున్నారని, ఇది ఏఐ రంగంలో తమ టెక్నాలజీకి పెరుగుతున్న ఆదరణకు నిదర్శనమని సంస్థ పేర్కొంది.

2022లో ఎలాన్ మస్క్ ట్విట్టర్‌ను టేకోవర్ చేసిన తర్వాత పరాగ్ అగర్వాల్‌ను సీఈఓ పదవి నుంచి తొలగించిన విషయం తెలిసిందే. ఆ తర్వాత తనకు రావాల్సిన పరిహారం కోసం న్యాయపోరాటం చేసిన ఆయన, ఇప్పుడు సొంత స్టార్టప్‌తో అనూహ్య విజయం సాధించి టెక్ పరిశ్రమలో తన సత్తాను మరోసారి నిరూపించుకున్నారు. పరాగ్ స్టార్టప్ అతి తక్కువ సమయంలోనే సాధించిన ఈ అద్భుతమైన వృద్ధి, ఏఐ ఇన్‌ఫ్రాస్ట్రక్చర్ రంగంలో పెట్టుబడిదారులకు ఉన్న బలమైన నమ్మకాన్ని స్పష్టం చేస్తోంది.