చిరు-బాబీ సినిమాపై క్రేజీ అప్డేట్.. ఫైనల్ అయిన మెగాస్టార్ లుక్

మెగాస్టార్ చిరంజీవి అభిమానులకు అదిరిపోయే వార్త. ఆయన కథానాయకుడిగా, డైరెక్టర్ బాబీ దర్శకత్వంలో రాబోతున్న భారీ యాక్షన్ ఎంటర్‌టైనర్ కోసం లుక్ టెస్ట్ పూర్తయింది. ఈ విషయాన్ని నిర్మాణ సంస్థ కేవీఎన్ ప్రొడక్షన్స్, దర్శకుడు బాబీ అధికారికంగా ప్రకటించారు. దీంతో మెగా158 ప్రాజెక్ట్ మరో కీలక అడుగు ముందుకు వేసినట్టయింది.

ఈ సందర్భంగా నిర్మాణ సంస్థ కేవీఎన్ ప్రొడక్షన్స్ తమ ఎక్స్ ఖాతాలో పోస్ట్ చేస్తూ.. "మరో సంబరానికి తెరలేచింది. మెగాస్టార్ చిరంజీవి మెగా158 కోసం లుక్ టెస్ట్ పూర్తి చేశారు. ముహూర్తం, షూటింగ్ అప్డేట్స్ త్వరలో వెల్లడిస్తాం" అని పేర్కొంది. దర్శకుడు బాబీ కూడా స్పందిస్తూ.. "లుక్ టెస్ట్ పూర్తయింది. మెగాస్టార్ చిరంజీవి గారి లుక్‌ను ఈరోజు లాక్ చేశాం. ఈ ఆస‌క్తిక‌ర‌మైన‌ ప్రయాణాన్ని ప్రారంభించడానికి ఎంతో ఆత్రుతగా ఎదురుచూస్తున్నాను" అని తన ఆనందాన్ని పంచుకున్నారు.

గతేడాది చిరంజీవి పుట్టినరోజు సందర్భంగా ఈ సినిమాను అధికారికంగా ప్రకటించిన విషయం తెలిసిందే. ఆ సమయంలో "The blade that set the bloody benchmark" (రక్తపు సరిహద్దులను నిర్దేశించిన కత్తి) అనే ట్యాగ్‌లైన్‌తో, గోడను చీల్చుకుంటూ వచ్చిన గొడ్డలితో ఉన్న పోస్టర్‌ను విడుదల చేశారు. ఇది సినిమా ఎంత పవర్‌ఫుల్‌గా ఉండబోతోందో సూచించింది. అప్పుడు చిరంజీవి కూడా స్పందిస్తూ.. "ప్రియమైన బాబీతో, కేవీఎన్ ప్రొడక్షన్స్‌తో మరోసారి కలిసి పనిచేయడం సంతోషంగా ఉంది" అని తెలిపారు.

'వాల్తేరు వీరయ్య' వంటి బ్లాక్‌బస్టర్ విజయం తర్వాత చిరంజీవి, బాబీ కాంబినేషన్‌లో వస్తున్న రెండో చిత్రమిది. 'వాల్తేరు వీరయ్య'లో చిరంజీవితో పాటు రవితేజ కూడా నటించగా, మైత్రీ మూవీ మేకర్స్ నిర్మించారు. ఇప్పుడు ఈ కొత్త ప్రాజెక్ట్‌ను కేవీఎన్ ప్రొడక్షన్స్ భారీ బడ్జెట్‌తో నిర్మిస్తోంది. లుక్ టెస్ట్ పూర్తి కావడంతో త్వరలోనే ముహూర్తం జరిపి రెగ్యులర్ షూటింగ్ ప్రారంభించేందుకు చిత్రబృందం సన్నాహాలు చేస్తోంది. ఈ సినిమాపై మెగా అభిమానుల్లో, సినీ వర్గాల్లో భారీ అంచనాలు నెలకొన్నాయి.