ఐపీఎల్ 2026: టాస్ గెలిచిన గుజరాత్.. చెన్నై జట్టులో కీలక మార్పు

ఐపీఎల్ లో నేడు డబుల్ హెడర్ లో భాగంగా తొలి మ్యాచ్ లో చెన్నై సూపర్ కింగ్స్, గుజరాత్ టైటాన్స్ తలపడుతున్నాయి. టాస్ గెలిచిన గుజరాత్ బౌలింగ్ ఎంచుకుంది. ఆతిథ్య చెన్నై సూపర్ కింగ్స్ (సీఎస్‌కే) జట్టును మొదట బ్యాటింగ్‌కు ఆహ్వానించింది. టోర్నమెంట్‌లో సగం మ్యాచ్‌లు ముగిసిన దశలో, ఇరు జట్లు చెరో ఏడు మ్యాచ్‌లు ఆడి మూడు విజయాలు, నాలుగు ఓటములతో సమానంగా నిలిచాయి. దీంతో ప్లేఆఫ్స్ రేసులో ముందుకు సాగాలంటే ఈ మ్యాచ్ ఇరు జట్లకు కీలకంగా మారింది.

ముంబై ఇండియన్స్‌పై సంజూ శాంసన్ (101*) అజేయ శతకం, అకీల్ హోసేన్ నాలుగు వికెట్ల ప్రదర్శనతో సాధించిన భారీ విజయంతో చెన్నై ఆత్మవిశ్వాసంతో బరిలోకి దిగుతోంది. సొంత మైదానమైన చెపాక్‌లో ఈ సీజన్‌లో ఆడిన మూడు మ్యాచ్‌ల్లో రెండింట గెలిచి మంచి రికార్డుతో ఉంది. మరోవైపు, ముంబై, ఆర్‌సీబీల చేతిలో వరుసగా రెండు మ్యాచ్‌ల్లో ఓడిపోయి గుజరాత్ ఒత్తిడిలో ఉంది. బౌలింగ్ బలంగా ఉన్నా, మిడిల్ ఆర్డర్ వైఫల్యం ఆ జట్టును వేధిస్తోంది.

టాస్ గెలిచిన అనంతరం గుజరాత్ కెప్టెన్ శుభ్‌మన్ గిల్ మాట్లాడుతూ.. "మేం బౌలింగ్ చేస్తాం. వికెట్ బ్యాటింగ్‌కు అనుకూలంగా కనిపిస్తోంది. అందుకే లక్ష్యాన్ని ఛేదించడం మంచిదని భావిస్తున్నాం. మా బౌలర్లు కీలక ఓవర్లలో పరుగులు నియంత్రించడంపై దృష్టి పెట్టాలి" అని చెప్పాడు. 

సీఎస్‌కే కెప్టెన్ రుతురాజ్ గైక్వాడ్ స్పందిస్తూ.. "పిచ్ కాస్త పొడిగా ఉంది. మొదట బ్యాటింగ్ చేసి మంచి స్కోరు సాధించి దాన్ని కాపాడుకుంటాం. గత మ్యాచ్ గెలుపు మాలో ఆత్మవిశ్వాసం నింపింది. జట్టులో ఒక మార్పు చేశాం. ఉర్విల్ పటేల్ తుది జట్టులోకి వచ్చాడు" అని తెలిపాడు.

చెన్నై సూపర్ కింగ్స్: సంజూ శాంసన్ (వికెట్ కీపర్), రుతురాజ్ గైక్వాడ్ (కెప్టెన్), ఉర్విల్ పటేల్, డెవాల్డ్ బ్రెవిస్, శివమ్ దూబే, కార్తీక్ శర్మ, జేమీ ఓవర్టన్, అకీల్ హోసేన్, నూర్ అహ్మద్, అన్షుల్ కాంబోజ్, గురుజప్నీత్ సింగ్.

గుజరాత్ టైటాన్స్: శుభ్‌మన్ గిల్ (కెప్టెన్), సాయి సుదర్శన్, జోస్ బట్లర్ (వికెట్ కీపర్), షారుఖ్ ఖాన్, వాషింగ్టన్ సుందర్, జాసన్ హోల్డర్, రషీద్ ఖాన్, అర్షద్ ఖాన్, కగిసో రబాడ, మహమ్మద్ సిరాజ్, మానవ్ సుతార్.