డిజిటల్ వ్యాలెట్లపై ఆర్‌బీఐ కొత్త రూల్స్... కాస్తంత కఠినమే!

దేశంలో డిజిటల్ చెల్లింపులను మరింత సురక్షితంగా, పారదర్శకంగా మార్చేందుకు భారతీయ రిజర్వ్ బ్యాంక్ (ఆర్‌బీఐ) కీలక చర్యలు చేపట్టింది. ప్రీపెయిడ్ పేమెంట్ ఇన్‌స్ట్రుమెంట్స్ (పీపీఐ) అయిన డిజిటల్ వ్యాలెట్లు, ప్రీపెయిడ్ కార్డులకు సంబంధించి కొత్త ముసాయిదా మార్గదర్శకాలను విడుదల చేసింది. వినియోగదారుల రక్షణ, నిర్వహణలో స్పష్టత పెంచడమే ఈ ప్రతిపాదనల ముఖ్య ఉద్దేశం.

ఈ ముసాయిదా ప్రకారం, నాన్-బ్యాంక్ సంస్థలు పీపీఐ సేవలు అందించాలంటే కనీసం రూ. 5 కోట్ల నికర విలువ కలిగి ఉండాలి. కార్యకలాపాలు ప్రారంభించిన మూడేళ్లలోగా ఈ విలువను రూ. 15 కోట్లకు పెంచుకోవాలి. అలాగే, వినియోగదారుల నుంచి సేకరించిన నిధులను వాణిజ్య బ్యాంకులోని ప్రత్యేక ఎస్క్రో ఖాతాలో జమ చేయడాన్ని తప్పనిసరి చేశారు. డెబిట్ కార్డులు జారీ చేసే బ్యాంకులు కూడా ఆర్‌బీఐకి సమాచారం ఇచ్చి పీపీఐ సేవలు అందించవచ్చని ప్రతిపాదించారు.

లావాదేవీల పరిమితులపై కూడా డ్రాఫ్ట్‌లో స్పష్టత ఇచ్చారు. సాధారణ పీపీఐలలో గరిష్ఠంగా రూ. 2 లక్షల వరకు బ్యాలెన్స్ ఉంచుకోవచ్చు. నెలకు రూ. 10,000 వరకు నగదు లోడ్ చేసుకోవడానికి అనుమతిస్తారు. చిన్న మొత్తాల పీపీఐల గరిష్ఠ పరిమితిని రూ. 10,000గా, ట్రాన్సిట్ కార్డుల పరిమితిని రూ. 3,000గా నిర్ణయించారు.

వినియోగదారుల ప్రయోజనాలే లక్ష్యంగా, అన్ని ఛార్జీలు, నిబంధనలు, వ్యాలిడిటీ వివరాలను ఇంగ్లీష్, హిందీతో పాటు స్థానిక భాషలో స్పష్టంగా తెలియజేయాలని ఆర్‌బీఐ ఆదేశించింది. విఫలమైన, రద్దయిన లావాదేవీలకు సంబంధించిన డబ్బును తక్షణమే వినియోగదారుడి వ్యాలెట్‌కు రిఫండ్ చేయాలని పేర్కొంది. ఈ ముసాయిదాపై మే 22లోగా ప్రజలు, భాగస్వామ్య పక్షాలు తమ అభిప్రాయాలను తెలపాలని ఆర్‌బీఐ కోరింది.