ఆ మూడు ఓవర్లే కొంపముంచాయి.. కోహ్లీ క్యాచ్ వదిలేసి మూల్యం చెల్లించాం: ఓటమిపై కెప్టెన్ గిల్

ఐపీఎల్ 2026లో భాగంగా శుక్రవారం రాయల్ ఛాలెంజర్స్ బెంగళూరు (ఆర్సీబీ) చేతిలో గుజరాత్ టైటాన్స్ (జీటీ) 5 వికెట్ల తేడాతో ఓటమిపాలైంది. బెంగళూరులోని చిన్నస్వామి స్టేడియంలో జరిగిన ఈ మ్యాచ్ అనంతరం గుజరాత్ కెప్టెన్ శుభ్‌మన్ గిల్ మాట్లాడుతూ.. తమ ఓటమికి గల కారణాలను స్పష్టంగా విశ్లేషించాడు. ముఖ్యంగా కొన్ని కీలక ఓవర్లలో తాము వెనుకబడటమే మ్యాచ్‌ను చేజార్చుకోవడానికి దారితీసిందని అంగీకరించాడు.

ఓటమిపై గిల్ మాట్లాడుతూ... "మా ఇన్నింగ్స్‌లో 16 నుంచి 19వ ఓవర్ మధ్య మేము ఒక్క బౌండరీ కూడా సాధించలేకపోయాం. ఆ మూడు ఓవర్లు మాకు చాలా కీలకం. పవర్‌ప్లే ముగిసే సమయానికి మేము మంచి స్థితిలోనే ఉన్నాం. ఆ తర్వాత వికెట్లు తీయడం ఎంతో అవసరం" అని తెలిపాడు. బౌలింగ్‌లో కూడా తమ జట్టు విఫలమైందని ఒప్పుకున్నాడు. "మేము సరైన లెంగ్త్‌లలో నిలకడగా బంతులు వేయలేకపోయాం. అయితే, ఆర్సీబీ బ్యాటర్లు మిడిల్ ఓవర్లలో చాలా బాగా ఆడారు" అని ప్రశంసించాడు.

విరాట్ కోహ్లీ సున్నా పరుగుల వద్ద ఉన్నప్పుడు క్యాచ్ జారవిడచడం మ్యాచ్‌ను మలుపు తిప్పిందని గిల్ అభిప్రాయపడ్డాడు. "ఒక బ్యాటర్ సున్నా వద్ద ఉన్నప్పుడు క్యాచ్ వదిలేస్తే ఫీల్డర్‌కు చాలా కష్టంగా ఉంటుంది. కానీ దాని నుంచి ఎలా పుంజుకున్నామన్నదే ముఖ్యం. ఆ క్యాచ్ తర్వాత కోహ్లీ అద్భుతంగా ఆడాడు" అని అన్నాడు. ఆ అవకాశాన్ని సద్వినియోగం చేసుకున్న కోహ్లీ 44 బంతుల్లో 81 పరుగులు చేసి ఆర్సీబీ విజయంలో కీలక పాత్ర పోషించాడు. అతనికి దేవదత్ పడిక్కల్ (27 బంతుల్లో 55) చక్కటి సహకారం అందించాడు.

అంతకుముందు గుజరాత్ టైటాన్స్ 205/3 పరుగుల భారీ స్కోరు సాధించింది. సాయి సుదర్శన్ (58 బంతుల్లో 100) అద్భుత శతకంతో చెలరేగాడు. ఈ క్రమంలో ఐపీఎల్‌లో అత్యంత వేగంగా 2000 పరుగులు పూర్తి చేసిన ఆటగాడిగా రికార్డు సృష్టించాడు. అయితే, అతని శతకం జట్టును గెలిపించలేకపోయింది. చివర్లో కృనాల్ పాండ్య (12 బంతుల్లో 23 నాటౌట్) మెరుపు ఇన్నింగ్స్‌తో ఆర్సీబీకి విజయాన్ని అందించాడు.