స్టాక్ మార్కెట్లకు చమురు దెబ్బ... ఇవాళ కూడా కుప్పకూలిన సూచీలు

అంతర్జాతీయంగా చమురు ధరలు భగ్గుమనడంతో శుక్రవారం భారత స్టాక్ మార్కెట్లు భారీ నష్టాలతో ముగిశాయి. అమెరికా-ఇరాన్ చర్చలు నిలిచిపోవడం, హర్మూజ్ జలసంధిలో సరఫరాకు అంతరాయం కలగడం వంటి భౌగోళిక రాజకీయ ఉద్రిక్తతలు ఇన్వెస్టర్ల సెంటిమెంట్‌ను తీవ్రంగా దెబ్బతీశాయి. ఫలితంగా, బీఎస్ఈ సెన్సెక్స్ 982.71 పాయింట్లు నష్టపోయి 76,681.29 వద్ద ముగిసింది. అదేవిధంగా, ఎన్ఎస్ఈ నిఫ్టీ 275.10 పాయింట్లు పతనమై కీలకమైన 24,000 మార్కు దిగువన 23,897.95 వద్ద స్థిరపడింది.

ప్రధానంగా ఐటీ రంగ షేర్లలో అమ్మకాల ఒత్తిడి మార్కెట్లను కుంగదీసింది. నిఫ్టీ ఐటీ ఇండెక్స్ ఏకంగా 5 శాతం మేర పడిపోయింది. ఇన్ఫోసిస్, టీసీఎస్, టెక్ మహీంద్రా వంటి దిగ్గజ షేర్లు భారీగా నష్టపోయాయి. ఐటీతో పాటు ఫార్మా, మీడియా రంగ సూచీలు కూడా నష్టాల్లో ముగిశాయి. 

అయితే, నిఫ్టీ మెటల్ ఇండెక్స్ మాత్రం స్వల్ప నష్టాలతో మిగతా రంగాలతో పోలిస్తే నిలకడగా కనిపించింది. బ్రాడర్ మార్కెట్లలోనూ ఇదే ట్రెండ్ కొనసాగింది. నిఫ్టీ మిడ్‌క్యాప్, స్మాల్‌క్యాప్ సూచీలు దాదాపు ఒక శాతం మేర నష్టపోయాయి.

అంతర్జాతీయ మార్కెట్లో బ్రెంట్ క్రూడ్ ఆయిల్ ధర బ్యారెల్‌కు 100 డాలర్ల మార్కును దాటి, 2.07 శాతం పెరిగి 107.25 డాలర్ల వద్ద ట్రేడ్ అయింది. చమురు ధరల పెరుగుదల ద్రవ్యోల్బణానికి దారితీస్తుందని, ఇది దేశ కరెంట్ ఖాతా లోటును పెంచుతుందని నిపుణులు ఆందోళన వ్యక్తం చేస్తున్నారు. 

టెక్నికల్ పరంగా, నిఫ్టీకి 24,000 స్థాయి బలమైన నిరోధకంగా మారిందని, ఒకవేళ సూచీ 23,800 స్థాయిని కోల్పోతే 23,600 వరకు పడిపోయే అవకాశం ఉందని విశ్లేషకులు అంచనా వేస్తున్నారు.