పూర్తి ఫిట్‌నెస్‌తో ధోనీ.. ముంబైతో మ్యాచ్‌లో బరిలోకి?

చెన్నై సూపర్ కింగ్స్ (సీఎస్‌కే) అభిమానులకు ఇది శుభసంకేతమే. పిక్క కండరాల గాయంతో గత ఆరు మ్యాచ్‌లకు దూరమైన సీఎస్‌కే వెటరన్ ఆటగాడు, మాజీ కెప్టెన్ ఎంఎస్ ధోనీ తిరిగి మైదానంలోకి అడుగుపెట్టేందుకు సిద్ధమవుతున్నట్టు కనిపిస్తోంది. గురువారం ముంబై ఇండియన్స్‌తో జరగనున్న కీలక మ్యాచ్‌కు ముందు, ధోనీ పూర్తిస్థాయి ప్రాక్టీస్ సెషన్‌లో పాల్గొనడం జట్టులో కొత్త ఉత్సాహాన్ని నింపింది.

గాయం తర్వాత తొలిసారిగా ధోనీ నెట్స్‌లో దాదాపు గంట పాటు తీవ్రంగా శ్రమించాడు. ఈ సెషన్‌లో బ్యాటింగ్‌తో పాటు వికెట్ కీపింగ్ డ్రిల్స్‌లో కూడా పాల్గొనడం విశేషం. పేసర్లు మ్యాట్ హెన్రీ, జామీ ఓవర్‌టన్ బౌలింగ్‌ను ఎదుర్కొన్న ధోనీ, ఎలాంటి అసౌకర్యం లేకుండా స్వేచ్ఛగా కదులుతూ కనిపించాడు. సాధారణంగా ప్రాక్టీస్‌లో వికెట్ కీపింగ్ చేయని ధోనీ, ఈసారి హెల్మెట్, ప్యాడ్స్, గ్లౌవ్స్ ధరించి కీపింగ్ చేయడం అందరినీ ఆశ్చర్యపరిచింది.

ఈ ప్రాక్టీస్ సెషన్‌ను దగ్గర నుంచి గమనించిన ముంబై ఇండియన్స్ మాజీ బ్యాటర్ ఆదిత్య తారే, ధోనీ ఫిట్‌నెస్‌పై కీలక వ్యాఖ్యలు చేశాడు. జియోస్టార్‌తో మాట్లాడుతూ.. "ప్రాక్టీస్‌లో మహీ భాయ్ వికెట్ కీపింగ్ చేయడం చూసి నేను ఆశ్చర్యపోయాను. నెట్స్‌లో అతను కీపింగ్ గ్లోవ్స్ ధరించడం నేను ముందెన్నడూ చూడలేదు. సాధారణంగా అతను బ్యాటింగ్ లేదా బౌలింగ్ మాత్రమే చేస్తాడు. గాయం తర్వాత తన మ్యాచ్ ఫిట్‌నెస్‌ను పరీక్షించుకునేందుకే బహుశా అతను కీపింగ్ చేసి ఉండొచ్చు" అని అభిప్రాయపడ్డాడు.

"ఇంతకుముందు అతను బ్యాటింగ్ ప్రాక్టీస్ చేయడం చూశాం. కానీ, ఈ ఏడాది కీపింగ్ చేయడం ఇదే తొలిసారి. ఇది మంచి సంకేతం. సీఎస్‌కే త్వరలోనే అతడిని తిరిగి మైదానంలోకి తీసుకురావచ్చు. ఒకవేళ ముంబై ఇండియన్స్‌తో జరిగే మ్యాచ్‌లో అతను పునరాగమనం చేస్తే, అది నిజంగా చాలా ప్రత్యేకంగా ఉంటుంది" అని తారే పేర్కొన్నాడు.

ధోనీ పూర్తి ఫిట్‌నెస్‌తో ప్రాక్టీస్‌లో పాల్గొనడంతో ముంబైతో జరగనున్న హై-ప్రొఫైల్ మ్యాచ్‌కు అతను అందుబాటులో ఉంటాడని సీఎస్‌కే యాజమాన్యం ఆశిస్తోంది. ధోనీ అనుభవం, నాయకత్వ పటిమ జట్టుకు అదనపు బలంగా మారుతుందనడంలో సందేహం లేదు.