4 వారాల్లో నివేదిక.. టీజీఆర్టీసీ ఉద్యోగుల వినతులపై సర్కార్ కీలక నిర్ణయం

తెలంగాణ రాష్ట్ర రోడ్డు రవాణా సంస్థ (టీజీఆర్టీసీ) ఉద్యోగుల సమస్యల పరిష్కారం దిశగా రాష్ట్ర ప్రభుత్వం కీలక అడుగు వేసింది. ఆర్టీసీ కార్మికుల సర్వీస్ రూల్స్, ఇతర పెండింగ్ సమస్యలపై అధ్యయనం చేసేందుకు ఉన్నత స్థాయి అధికారులతో కూడిన ఒక ప్రత్యేక కమిటీని ఏర్పాటు చేసింది.

గత కొంతకాలంగా తమ సేవా నిబంధనలతో పాటు పలు సమస్యలను పరిష్కరించాలని కోరుతూ టీజీఆర్టీసీ ఉద్యోగుల నుంచి ప్రభుత్వానికి భారీగా వినతులు వస్తున్నాయి. ఈ విజ్ఞప్తులను లోతుగా పరిశీలించిన ప్రభుత్వం.. ఉద్యోగులు ఎదుర్కొంటున్న ఇబ్బందులను అధ్యయనం చేసి, తగిన సిఫార్సులు చేసేందుకు ఈ కమిటీకి బాధ్యతలు అప్పగించింది.

ఈ ఉన్నత స్థాయి కమిటీకి ఛైర్మన్‌గా రవాణా, రోడ్లు భవనాల శాఖ ప్రత్యేక ప్రధాన కార్యదర్శి వ్యవహరించనున్నారు. కార్మిక, ఉపాధి, శిక్షణ, కర్మాగారాల శాఖ ప్రత్యేక ప్రధాన కార్యదర్శి, అలాగే ఆర్థిక శాఖ ముఖ్య కార్యదర్శి ఇందులో సభ్యులుగా ఉంటారు. టీజీఆర్టీసీ వైస్ ఛైర్మన్ అండ్ మేనేజింగ్ డైరెక్టర్ ఈ కమిటీలో సభ్యుడిగా, కన్వీనర్‌గా బాధ్యతలు నిర్వర్తిస్తారు.

ఆర్టీసీ ఉద్యోగులు లేవనెత్తిన అన్ని అంశాలను ఈ అధికారుల బృందం సమగ్రంగా పరిశీలించనుంది. ఉత్తర్వులు జారీ చేసిన తేదీ నుంచి 4 వారాల వ్యవధిలోగా అధ్యయనం పూర్తి చేసి, ప్రభుత్వానికి తుది నివేదికను సమర్పించాలని సర్కార్ స్పష్టం చేసింది.