తనకు అప్పు ఉందన్న క్రిస్ గేల్.. లలిత్ మోదీ ఏం చేశాడంటే..!

ఐపీఎల్ మాజీ ఛైర్మన్ లలిత్ మోదీ, వెస్టిండీస్ విధ్వంసకర బ్యాటర్ క్రిస్ గేల్‌కు సంబంధించి ఒక ఆసక్తికరమైన పాత జ్ఞాపకాన్ని పంచుకున్నారు. 2011 ఐపీఎల్ వేలంలో క్రిస్ గేల్ అమ్ముడుపోని (అన్‌సోల్డ్) సమయంలో, అతడి కెరీర్ మలుపు తిరగడానికి తాను ఎలా కారణమయ్యానో ఒక పాడ్‌కాస్ట్‌లో వెల్లడించారు.

ఇంగ్లండ్ మాజీ కెప్టెన్ మైఖేల్ వాన్‌తో మాట్లాడుతూ లలిత్ మోదీ ఈ విషయాన్ని బయటపెట్టారు. "2011 వేలంలో గేల్‌ను ఏ జట్టూ కొనలేదు. ఆ సమయంలో అతను నాకు ఫోన్ చేసి, 'నన్ను ఎవరూ తీసుకోలేదు' అని నిరాశగా చెప్పాడు. అప్పుడు నేను, 'నువ్వు సరిగ్గా ఆడలేదు. ఐపీఎల్ అంటే పెర్ఫార్మెన్స్ ముఖ్యం. కేకేఆర్ తరఫున సోమరితనం చూపించావు' అని అన్నాను. దానికి గేల్, 'నాకు పెద్ద అప్పు ఉంది, బిల్లులు కట్టాలి' అని తన ఆర్థిక ఇబ్బందుల గురించి చెప్పాడు" అని మోదీ గుర్తుచేసుకున్నారు.

గేల్ పరిస్థితిని అర్థం చేసుకున్న తాను, ఇతర జట్లకు ఫోన్ చేసినా ప్రయోజనం లేకపోయిందని మోదీ తెలిపారు. ఆ తర్వాత నేరుగా విజయ్ మాల్యా ఇంటికి వెళ్లి, "విజయ్, ఈ కుర్రాడికి ఒక అవకాశం ఇవ్వు" అని కోరినట్టు చెప్పారు. దానికి మాల్యా, "మా జట్టులో ఓపెనర్ డర్క్ నానెస్ గాయపడ్డాడు. ఖాళీ ఉంది. కానీ, గేల్ రాణిస్తేనే డబ్బులు చెల్లిస్తాను" అని షరతు పెట్టారని వివరించారు.

ఈ విషయాన్ని గేల్‌కు చెప్పి, "వెళ్లి సత్తా చాటు" అని ప్రోత్సహించానని లలిత్ మోదీ అన్నారు. ఆ తర్వాత జరిగిందంతా చరిత్ర. ఆర్‌సీబీ తరఫున ఆ సీజన్‌లో 12 మ్యాచ్‌ల్లో 608 పరుగులు సాధించి గేల్ ఆరెంజ్ క్యాప్ గెలుచుకున్నాడు. అప్పటి నుంచి అతని కెరీర్ తిరిగి పుంజుకుని, ఐపీఎల్ చరిత్రలోనే ఒక లెజెండ్‌గా నిలిచిపోయాడు.