అమెరికా దిగ్బంధనం... సూపర్ ట్యాంకర్ భారత్ చేరుకుందని హైదరాబాద్ ఇరాన్ కాన్సులేట్ ట్వీట్

2 మిలియన్ బ్యారెళ్ల క్రూడాయిల్‌తో కూడిన సూపర్ ట్యాంకర్ 'డోర్నా' భారత దక్షిణ తీరానికి చేరుకుందని హైదరాబాద్‌లోని ఇరాన్ కాన్సులేట్ జనరల్ 'ఎక్స్' వేదికగా ట్వీట్ చేసింది. అమెరికా నావికాదళం హర్మూజ్ జలసంధిని దిగ్బంధించినప్పటికీ ముడి చమురుతో కూడిన ఈ ట్యాంకర్ విజయవంతంగా భారత్ చేరుకుందని పేర్కొంది. అమెరికా దిగ్బంధనానికి కొద్దిసేపటి ముందే ఇరాన్ జలాల నుంచి ఇది బయలుదేరిందని పేర్కొంది.

ఇదిలా ఉండగా, అమెరికా ఆంక్షలు, నావికాదళం గస్తీ నడుమ కూడా వారం రోజుల వ్యవధిలో భారత్‌కు మూడు విడతల్లో దాదాపు 6 మిలియన్ బ్యారెళ్ల ముడి చమురు వచ్చింది. ప్రస్తుతం దక్షిణ తీరానికి చేరుకున్న డోర్నా నౌక సమీపంలోని స్థానిక రిఫైనరీకి సుమారు 20 లక్షల బ్యారెళ్ల చమురును అందజేయనున్నట్లు తెలుస్తోంది.