మాజీ ఉప ముఖ్యమంత్రికే గన్ గురిపెట్టిన ఆగంతకుడు.. గురుగ్రామ్‌లో హైడ్రామా

హర్యానా మాజీ ఉప ముఖ్యమంత్రి, జననాయక్ జనతా పార్టీ (జేజేపీ) అధినేత దుష్యంత్ చౌతాలాకు తృటిలో పెను ప్రమాదం తప్పింది. గురుగ్రామ్‌లో ఆయన ప్రయాణిస్తున్న కారును అడ్డగించిన ఓ వ్యక్తి, నేరుగా ఆయనపైకి పిస్టల్ గురిపెట్టడం రాష్ట్రవ్యాప్తంగా సంచలనం సృష్టిస్తోంది. ఈ ఘటనతో హర్యానా రాజకీయాల్లో ఒక్కసారిగా వేడి రాజుకుంది.

వివరాల్లోకి వెళితే.. దుష్యంత్ చౌతాలా తన కారులో వెళుతుండగా పోలీసు వాహనం అడ్డగించింది. అందులో నుంచి ఓ వ్యక్తి కిందికి దిగి తన వద్ద ఉన్న పిస్టల్‌ తో కారు లోపల ఉన్న చౌతాలాకు గురిపెట్టాడు. దీంతో అక్కడున్న వారంతా ఒక్కసారిగా ఉలిక్కిపడ్డారు. వెంటనే అప్రమత్తమైన చౌతాలా భద్రతా సిబ్బంది, అనుచరులు ఆ వ్యక్తిని పట్టుకునేందుకు ప్రయత్నించారు.

ఈ ఘటనకు సంబంధించిన వీడియో సోషల్ మీడియాలో వైరల్ కావడంతో దుమారం రేగింది. ‘పోలీసు వేషంలో గూండాలు’ (#PoliceKeBheshMeinGunde) అనే హ్యాష్‌ట్యాగ్‌తో నెటిజన్లు, జేజేపీ కార్యకర్తలు తీవ్రంగా స్పందిస్తున్నారు. నిందితుడి ప్రవర్తన, తీరు చూస్తుంటే అతను నకిలీ పోలీసు అయిఉండవచ్చని అనుమానాలు వ్యక్తమవుతున్నాయి. మాజీ ఉప ముఖ్యమంత్రికే రక్షణ లేకపోతే సామాన్యుల పరిస్థితి ఏంటని విపక్షాలు ప్రభుత్వాన్ని ప్రశ్నిస్తున్నాయి.