పాక్ మధ్యవర్తిత్వంతో మరో దఫా చర్చలు.. తగ్గుముఖం పట్టనున్న అమెరికా-ఇరాన్ ఉద్రిక్తతలు!

పశ్చిమాసియాలో నెలకొన్న ఉద్రిక్తతలను తగ్గించే దిశగా కీలక పరిణామాలు చోటుచేసుకుంటున్నాయి. ఒకవైపు అమెరికా, ఇరాన్ మధ్య చర్చలకు రంగం సిద్ధం కాగా, మరోవైపు ఇజ్రాయెల్-లెబనాన్ సరిహద్దులో కాల్పుల విరమణకు ఒప్పందం కుదిరింది. పాకిస్థాన్ మధ్యవర్తిత్వంతో అమెరికా, ఇరాన్ మధ్య సోమవారం ఇస్లామాబాద్‌లో తాజా చర్చలు జరగనున్నాయని ఇరాన్ అధికారులు తెలిపారు. ఆదివారం నాటికి ఇరు దేశాల ప్రతినిధులు పాకిస్థాన్ రాజధానికి చేరుకునే అవకాశం ఉందని ఆ కథనంలో పేర్కొంది.

ఈ చర్చల నేపథ్యంలో దౌత్యపరమైన ప్రయత్నాలు ముమ్మరమయ్యాయి. పాకిస్థాన్ ఆర్మీ చీఫ్ అసీమ్ మునీర్ గురువారం టెహ్రాన్‌లో ఇరాన్ పార్లమెంట్ స్పీకర్ మహమ్మద్ బఘేర్ ఘలీబాఫ్‌తో సమావేశమయ్యారు. ఇరాన్ అణు కార్యక్రమంపై నిలిచిపోయిన చర్చలను పునరుద్ధరించడమే లక్ష్యంగా ఈ భేటీ జరిగినట్లు తెలుస్తోంది. అంతకుముందు విఫలమైన చర్చల తర్వాత, రెండో రౌండ్ చర్చలకు మార్గం సుగమం చేసేందుకు ఈ పర్యటన దోహదపడుతుందని అధికారులు భావిస్తున్నారు.

మరోవైపు, ఖతార్ ఎమిర్ షేక్ తమీమ్ బిన్ హమద్ అల్ థానీ, టర్కీ అధ్యక్షుడు రెసెప్ తయ్యిప్ ఎర్డోగాన్ పాకిస్థాన్ ప్రధాని షెహబాజ్ షరీఫ్‌తో భేటీ అయ్యారు. ‘అల్ జజీరా’ కథనం ప్రకారం అంటాల్యా డిప్లొమసీ ఫోరమ్ సందర్భంగా ఈ సమావేశం జరిగింది. పశ్చిమాసియాలో ఉద్రిక్తతలను తగ్గించేందుకు పాకిస్థాన్ చేస్తున్న ప్రయత్నాలను ఖతర్, టర్కీ అధినేతలు ప్రశంసించి, తమ మద్దతు ప్రకటించారు.

ఇదిలా ఉండగా, ఇజ్రాయెల్, హిజ్బుల్లా మధ్య 10 రోజుల కాల్పుల విరమణ ఒప్పందం కుదిరినట్లు అమెరికా అధ్యక్షుడు డొనాల్డ్ ట్రంప్ ప్రకటించారు. ఇరుపక్షాల మధ్య పెరుగుతున్న ఘర్షణలను నివారించేందుకు దౌత్యపరంగా చేసిన ప్రయత్నాలు ఫలించాయని తెలిపారు. లెబనాన్ అధ్యక్షుడు జోసెఫ్ అవూన్, ఇజ్రాయెల్ ప్రధాని బెంజమిన్ నెతన్యాహులతో తాను జరిపిన చర్చలు సఫలమయ్యాయని, ఇద్దరు నేతలు తాత్కాలిక సంధికి కట్టుబడి ఉంటామని హామీ ఇచ్చారని ట్రంప్ వివరించారు.

గతంలో ఏప్రిల్ 11-12 తేదీల్లో ఇస్లామాబాద్‌లో జరిగిన శాంతి చర్చలు ఎటువంటి పురోగతి లేకుండా ముగిశాయి. 1979 ఇస్లామిక్ విప్లవం తర్వాత ఇరు దేశాల మధ్య జరిగిన తొలి ఉన్నతస్థాయి ప్రత్యక్ష చర్చలు అవే కావడం గమనార్హం. ప్రస్తుతం ఒకేసారి రెండు వేర్వేరు ప్రాంతాల్లో జరుగుతున్న ఈ శాంతి ప్రయత్నాలు పశ్చిమాసియాలో స్థిరత్వాన్ని తీసుకురావడంలో కీలకపాత్ర పోషిస్తాయని అంతర్జాతీయ విశ్లేషకులు భావిస్తున్నారు.