పల్నాడులో ఏఎస్సై బాగోతం.. జంటలను వీడియోలు తీసి బ్లాక్‌మెయిల్!

పల్నాడు జిల్లాలో ఓ ఏఎస్సై నిర్వాకం తీవ్ర కలకలం రేపుతోంది. ఏకాంతంగా గడుపుతున్న జంటలను లక్ష్యంగా చేసుకుని, వారిని వీడియోలు తీసి బ్లాక్‌మెయిల్ చేస్తున్నట్లు ఆరోపణలు వెల్లువెత్తుతున్నాయి. ఈ దందాకు సంబంధించిన వీడియోలు సామాజిక మాధ్యమాల్లో వైరల్ కావడంతో ఈ వ్యవహారం వెలుగులోకి వచ్చింది.

వివరాల్లోకి వెళితే.. మాచర్ల నియోజకవర్గ పరిధిలోని పర్యాటక ప్రాంతాలకు వచ్చే ప్రేమికులు, కళాశాల విద్యార్థులే లక్ష్యంగా ఈ ఏఎస్సై దందాలకు పాల్పడుతున్నాడు. జమ్మలమడుగుకు చెందిన ఓ ఆటోడ్రైవర్ సాయంతో జంటలు సన్నిహితంగా ఉన్నప్పుడు వీడియోలు తీయించి, వారిని స్టేషన్‌కు తీసుకెళ్తానంటూ బెదిరించి డబ్బులు వసూలు చేస్తున్నాడు. డబ్బులు ఇవ్వలేని యువతులను తన కోరిక తీర్చాలంటూ లైంగికంగా వేధిస్తున్నట్లు కూడా తీవ్ర ఆరోపణలు ఉన్నాయి.

ఇటీవల మాచర్లలోని ఓ వ్యాపారి, మహిళతో ఏకాంతంగా ఉన్న వీడియో తీసి, వారిని బెదిరించి పలుమార్లు డబ్బులు వసూలు చేసినట్లు సమాచారం. ఇదే పోలీస్ స్టేషన్‌లో పనిచేస్తున్న మరో ఎస్సై, కానిస్టేబుల్‌కు కూడా ఈ దందాలో భాగం ఉందని స్థానికంగా ఆరోపణలు వినిపిస్తున్నాయి. ఈ వ్యవహారంపై జిల్లా ఎస్పీ బి. కృష్ణారావు స్పందించారు. సోషల్ మీడియాలో వీడియోలు చక్కర్లు కొడుతున్న విషయం తమ దృష్టికి వచ్చిందని, దీనిపై పూర్తిస్థాయిలో విచారణ జరిపి, బాధ్యులపై కఠిన చర్యలు తీసుకుంటామని ఆయన హామీ ఇచ్చారు.