రాణించిన కోల్‌కతా బ్యాటర్లు... లక్నో టార్గెట్ 182

ఐపీఎల్ 2026 సీజన్‌లో భాగంగా లక్నో సూపర్ జెయింట్స్‌తో మ్యాచ్‌లో కోల్‌కతా నైట్ రైడర్స్ (కేకేఆర్) మెరుగైన స్కోరు సాధించింది. కోల్‌కతాలోని ఈడెన్ గార్డెన్స్ వేదికగా జరుగుతున్న ఈ మ్యాచ్‌లో టాస్ గెలిచిన లక్నో బౌలింగ్ ఎంచుకుంది. దీంతో మొదట బ్యాటింగ్ చేసిన కేకేఆర్, నిర్ణీత 20 ఓవర్లలో 4 వికెట్ల నష్టానికి 181 పరుగులు చేసింది. 

ఇన్నింగ్స్ ఆరంభంలో ఓపెనర్ ఫిన్ అలెన్ (9) విఫలమైనా, కెప్టెన్ అజింక్యా రహానే (41), అంగ్‌క్రిష్ రఘువంశీ (45) ఇన్నింగ్స్‌కు బలమైన పునాది వేశారు. ముఖ్యంగా రహానే కేవలం 24 బంతుల్లో 4 ఫోర్లు, 2 సిక్సర్లతో వేగంగా ఆడాడు. వీరిద్దరూ రెండో వికెట్‌కు 84 పరుగుల భాగస్వామ్యం నెలకొల్పారు. అయితే, మంచి ఊపు మీదున్న సమయంలో వీరిద్దరూ స్వల్ప వ్యవధిలో ఔట్ కావడం, ఆ తర్వాత రింకూ సింగ్ (4) కూడా విఫలమవడంతో కేకేఆర్ 111 పరుగులకే 4 వికెట్లు కోల్పోయి కాస్త తడబడింది.

ఈ క్లిష్ట సమయంలో కామెరాన్ గ్రీన్ (32 నాటౌట్), రోవ్‌మన్ పావెల్ (39 నాటౌట్) అద్భుతమైన భాగస్వామ్యంతో జట్టును ఆదుకున్నారు. చివరి ఓవర్లలో దూకుడుగా ఆడిన ఈ జోడీ, అబేధ్యమైన ఐదో వికెట్‌కు 70 పరుగులు జోడించి జట్టు స్కోరును 180 దాటించింది. లక్నో బౌలర్లలో దిగ్వేశ్ సింగ్ రాఠీ, మణిమారన్ సిద్ధార్థ్, ప్రిన్స్ యాదవ్, అవేష్ ఖాన్ తలో వికెట్ పడగొట్టారు. వీరిలో దిగ్వేశ్ సింగ్ రాఠీ 4 ఓవర్లలో కేవలం 25 పరుగులు ఇచ్చి పొదుపుగా బౌలింగ్ చేశాడు.