భారత్ మార్కెట్‌పై అమెరికా పెత్తనం చెల్లదు: రష్యా రాయబారి డెనిస్ అలిపోవ్

భారత్, రష్యా మధ్య చమురు వాణిజ్యం విషయంలో అమెరికా అనవసరంగా ఒత్తిడి తెస్తోందని, ఈ చర్యలను తాము తీవ్రంగా వ్యతిరేకిస్తున్నామని భారత్‌లో రష్యా రాయబారి డెనిస్ అలిపోవ్ స్పష్టం చేశారు. భారత్ ఎల్లప్పుడూ తన స్వతంత్ర విదేశాంగ విధానాన్నే అనుసరిస్తోందని, బయటి శక్తుల ఒత్తిడులను తిరస్కరించడాన్ని తాము స్వాగతిస్తున్నామని ఆయన పేర్కొన్నారు.

ఓ ఇంటర్వ్యూలో మాట్లాడుతూ... భారత మార్కెట్‌లో రష్యాకు అడ్డంకులు సృష్టించేందుకు అమెరికా ప్రయత్నిస్తున్నట్లు స్పష్టంగా కనిపిస్తోందని అలిపోవ్ అన్నారు. అంతర్జాతీయ రాజకీయాల్లో ఇలా ఒత్తిడి తీసుకురావడం, వ్యాపార సంబంధాలను దెబ్బతీయడం సరైన పద్ధతి కాదని ఆయన హితవు పలికారు. "అంతర్జాతీయంగా వ్యాపారం చేసే విధానం ఇది కాదు. భారత చమురు మార్కెట్‌పై అమెరికా ఒత్తిడిని మేము తిరస్కరిస్తున్నాం. భారత్ తన స్వతంత్ర విదేశాంగ విధానాన్ని అనుసరించడాన్ని మేం ఎంతో అభినందిస్తున్నాం" అని ఆయన వ్యాఖ్యానించారు.

ఇటీవలి కాలంలో రష్యా, భారత్ మధ్య సంబంధాలు, ముఖ్యంగా ఇంధన రంగంలో మరింత బలపడ్డాయని అలిపోవ్ తెలిపారు. రష్యా నుంచి భారత్‌కు చమురు దిగుమతులు గణనీయంగా పెరిగాయని ఆయన గుర్తుచేశారు. "ఇరు దేశాల ద్వైపాక్షిక వాణిజ్యం, ఆర్థిక సంబంధాలు విస్తరిస్తున్నాయి. ఇరు పక్షాల ప్రయోజనాల కోసం ఈ బంధాన్ని మరింత ముందుకు తీసుకెళ్లేందుకు మేము కట్టుబడి ఉన్నాం" అని ఆయన వివరించారు.

ప్రస్తుతం ప‌శ్చిమాసియాలో నెలకొన్న పరిణామాల నేపథ్యంలో ప్రపంచ ఇంధన మార్కెట్లలో తీవ్ర అస్థిరతకు అమెరికా అనుసరిస్తున్న "చమురు అంతరాయ దౌత్యమే" కారణమని ఆయన పరోక్షంగా విమర్శించారు. అయితే, రష్యా-భారత్ మధ్య వాణిజ్యం, ముఖ్యంగా చమురు వ్యాపారం అభివృద్ధి పథంలోనే కొనసాగుతోందని ధీమా వ్యక్తం చేశారు.

ఈ సందర్భంగా ప్రధాని నరేంద్ర మోదీ రష్యా పర్యటన గురించి కూడా ఆయన ప్రస్తావించారు. ఈ ఏడాది ప్రధాని మోదీ రష్యాలో పర్యటిస్తే మనస్ఫూర్తిగా స్వాగతిస్తామని అలిపోవ్ తెలిపారు. ఇరు దేశాల మధ్య ఏటా శిఖరాగ్ర సమావేశాలు నిర్వహించే సంప్రదాయం ఉందని, గతేడాది డిసెంబర్‌లో రష్యా అధ్యక్షుడు భారత్‌లో పర్యటించారని గుర్తు చేశారు.