భర్త మృతిని తట్టుకోలేక ఒకరు.. వరకట్న వేధింపులతో మరొకరు... చిన్నారులతో తల్లుల బలవన్మరణం

తెలంగాణలో రెండు వేర్వేరు చోట్ల జరిగిన హృదయ విదారక ఘటనలు తీవ్ర కలకలం రేపాయి. సంగారెడ్డి, వరంగల్ జిల్లాల్లో చోటుచేసుకున్న ఈ విషాదాల్లో ముగ్గురు చిన్నారులతో సహా ఇద్దరు తల్లులు ప్రాణాలు కోల్పోయారు. ఒకచోట భర్త మరణంతో కుంగిపోయిన మహిళ తన ఇద్దరు పిల్లలను చంపి ఆత్మహత్య చేసుకోగా, మరోచోట వరకట్న వేధింపులు భరించలేక ఓ మహిళ తన కుమారుడితో కలిసి కాలువలో దూకింది.

భర్త మరణంతో మనస్తాపం
సంగారెడ్డి జిల్లా కంది మండలం జుల్‌కల్‌లో జరిగిన ఘటన స్థానికులను కంటతడి పెట్టించింది. గ్రామానికి చెందిన మమతకు ఎనిమిదేళ్ల క్రితం ప్రవీణ్‌తో వివాహం జరిగింది. వీరికి కుమారుడు మణికంఠ (5), కూతురు ప్రణయశ్రీ ఉన్నారు. గత జనవరిలో ప్రవీణ్ రోడ్డు ప్రమాదంలో మరణించడంతో మమత తీవ్ర మనోవేదనకు గురైంది. భర్త లేని లోకంలో పిల్లలను పోషించలేనన్న ఆవేదనతో శనివారం ఆమె తన ఇద్దరు పిల్లలను గొంతు నులిమి హత్య చేసింది. అనంతరం ఇంట్లోని దూలానికి ఉరివేసుకుని ఆత్మహత్య చేసుకుంది. మృతురాలి తండ్రి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.

వరకట్న వేధింపులు భరించలేక
వరంగల్ జిల్లాలో మరో విషాదం చోటుచేసుకుంది. కానిస్టేబుల్ హరీశ్ భార్య కల్యాణి, తన మూడేళ్ల కుమారుడు శ్రేయాన్ష్‌తో కలిసి ఎస్సారెస్పీ కాలువలో దూకి ఆత్మహత్యకు పాల్పడింది. కొంతకాలంగా భర్త, అత్తింటి వారి నుంచి వరకట్న వేధింపులు ఎదుర్కొంటున్న ఆమె, మనస్తాపంతో ఈ నిర్ణయం తీసుకున్నట్లు తెలుస్తోంది. శనివారం పుట్టింటికి వచ్చిన ఆమె, కుమారుడితో బయటకు వెళ్లి తిరిగిరాలేదు. ప్రవాహం ఉద్ధృతంగా ఉండటంతో గల్లంతైన తల్లీకొడుకుల ఆచూకీ ఇంకా లభ్యం కాలేదు. వారి కోసం గాలింపు చర్యలు కొనసాగుతున్నాయి. ఈ రెండు ఘటనలు ఆయా ప్రాంతాల్లో తీవ్ర విషాదాన్ని నింపాయి.