ఈ ప్రపంచకప్ యావత్ భారత్ ది: కెప్టెన్ సూర్యకుమార్

2026 టీ20 ప్రపంచకప్‌లో టీమిండియా చారిత్రక విజయం సాధించిన నేపథ్యంలో కెప్టెన్ సూర్యకుమార్ యాదవ్ యావత్ దేశ ప్రజలకు, అభిమానులకు హృదయపూర్వక కృతజ్ఞతలు తెలిపాడు. ఈ టైటిల్‌ను టోర్నమెంట్ ఆద్యంతం జట్టుకు అండగా నిలిచిన కోట్లాది మంది మద్దతుదారులకు అంకితమిస్తున్నట్టు భావోద్వేగంతో ప్రకటించాడు. ఈ మేరకు బీసీసీఐ తాజాగా విడుదల చేసిన ఒక వీడియోలో ఆయన మాట్లాడాడు.

అభిమానుల ప్రార్థనలు, ప్రోత్సాహం లేకపోతే ఈ విజయం సాధ్యమయ్యేది కాదని సూర్యకుమార్ అన్నాడు. "ప్రియమైన టీమిండియా అభిమానులారా, ముందుగా మీ అందరికీ మనస్ఫూర్తిగా ధన్యవాదాలు. మీ మద్దతు, ఆశీస్సుల వల్లే మేం ఉన్నాం. ఈ ప్రపంచకప్ ట్రోఫీ యావత్ భారతదేశానిది" అని ఆయన పేర్కొన్నాడు. ఈ విజయం కేవలం జట్టుది మాత్రమే కాదని, దేశంలోని క్రికెట్ ప్రేమికులందరి కల అని ఆయన అభివర్ణించాడు.

"మేం గెలిచినప్పుడు, అది మా విజయం మాత్రమే కాదు. బ్యాట్, బంతితో పెరిగి దేశం కోసం ఆడాలని కలలు కనే ప్రతీ చిన్నారి కల అది. స్టేడియాలను నింపేసి, వాటిని సొంత ఇంటిలా మార్చేసే అభిమానులది. ఇళ్లలో ఉండి మమ్మల్ని ఆదరించే కోట్లాది మందిది" అని సూర్యకుమార్ వివరించాడు. టోర్నీలో ఎదురైన క్లిష్ట సమయాల్లో అభిమానుల ప్రార్థనలు, బేషరతు ప్రేమ తమకు ఎంతో బలాన్ని ఇచ్చాయని ఆయన గుర్తుచేసుకున్నాడు.

"మీ ప్రార్థనలు, ప్రేమకు మా కృతజ్ఞతలను మాటల్లో చెప్పలేం. చివరిగా ఒక్కటే చెబుతున్నా, భారత్‌లో క్రికెట్ కేవలం ఆట కాదు, అదొక ఎమోషన్. ఈ విజయం మీ అందరిది" అంటూ సూర్య ముగించాడు.

ఆదివారం నరేంద్ర మోదీ స్టేడియంలో జరిగిన ఫైనల్‌లో న్యూజిలాండ్‌పై 96 పరుగుల తేడాతో భారత్ ఘన విజయం సాధించిన సంగతి తెలిసిందే. ఈ గెలుపుతో భారత్ మూడు టీ20 ప్రపంచకప్ టైటిళ్లు గెలిచిన తొలి జట్టుగా రికార్డు సృష్టించింది. అలాగే, స్వదేశంలో టైటిల్‌ను నిలబెట్టుకున్న తొలి జట్టుగా కూడా చరిత్రకెక్కింది. ఈ విజయంతో సూర్యకుమార్ యాదవ్ కూడా ఎంఎస్ ధోనీ, రోహిత్ శర్మల తర్వాత టీ20 ప్రపంచకప్‌ను కెప్టెన్‌గా గెలిచిన ప్రత్యేక క్లబ్‌లో చేరాడు.