157 బిలియన్ డాలర్లకు యూఎస్ పెట్ ఇండస్ట్రీ.. అయినా చిక్కుల్లో చిన్న వ్యాపారులు

అమెరికాలో పెంపుడు జంతువుల పరిశ్రమ (పెట్ ఇండస్ట్రీ) రికార్డు స్థాయిలో 157 బిలియన్ డాలర్ల మార్కెట్‌కు చేరుకుంది. అయితే, ఈ రంగం వేగంగా అభివృద్ధి చెందుతున్నప్పటికీ.. పెరుగుతున్న వైద్య ఖర్చులు, నియంత్రణపరమైన అడ్డంకులు, కార్మికుల కొరత వంటి సవాళ్లతో చిన్న వ్యాపారాలు తీవ్ర ఇబ్బందులు ఎదుర్కొంటున్నాయి.

బుధవారం సెనేట్ స్మాల్ బిజినెస్ అండ్ ఎంటర్‌ప్రెన్యూర్‌షిప్ కమిటీ నిర్వహించిన విచారణలో పలువురు వ్యాపార యజమానులు ఈ సమస్యలను చట్టసభ సభ్యుల దృష్టికి తీసుకెళ్లారు. అమెరికాలో సుమారు 57 శాతం కుటుంబాలు కనీసం ఒక పెంపుడు జంతువును కలిగి ఉన్నాయని, ముఖ్యంగా గ్రామీణ ప్రాంతాల్లో ఇది 71 శాతంగా ఉందని కమిటీ చైర్ సెనెటర్ జోని ఎర్నెస్ట్ తెలిపారు. పెంపుడు జంతువుల సంరక్షణ కోసం వెటర్నరీ క్లినిక్‌లు, పెట్ స్టోర్లు, గ్రూమింగ్ సేవలు వంటివి స్థానిక ఆర్థిక వ్యవస్థలకు కీలకంగా మారాయని సభ్యులు పేర్కొన్నారు.

అయితే, వ్యాపార నిర్వహణ ఖర్చులు విపరీతంగా పెరిగాయని పలువురు యజమానులు ఆవేదన వ్యక్తం చేశారు. "ఉద్యోగుల ఆరోగ్య బీమా ప్రీమియంలు ఏటా భారీగా పెరుగుతున్నాయి. ఇది మాపై తీవ్ర భారం మోపుతోంది" అని బోస్టన్‌కు చెందిన 'పోల్కా డాగ్' పెట్ ట్రీట్ కంపెనీ సహ వ్యవస్థాపకుడు రాబర్ట్ వాన్ సికిల్ అన్నారు. అలాగే, ఉత్పత్తులను దేశవ్యాప్తంగా విక్రయించాలంటే 50 రాష్ట్రాల్లో వేర్వేరు నిబంధనలు పాటించాల్సి రావడం గందరగోళంగా ఉందని ఆయన వివరించారు.

మరోవైపు, ఇంధనం, విద్యుత్, ఆహారం ధరల పెరుగుదల (పెట్ ఇన్‌ఫ్లేషన్) వల్ల పెంపుడు జంతువుల యజమానులు, వ్యాపారులు ఇద్దరూ ఇబ్బంది పడుతున్నారని డెమోక్రాట్ సెనెటర్ ఎడ్వర్డ్ మార్కీ అన్నారు. కొవిడ్ మహమ్మారి సమయంలో చాలామంది ఇళ్ల నుంచి పనిచేయడంతో పెంపుడు జంతువుల పెంపకం పెరిగి, ఈ పరిశ్రమ భారీగా వృద్ధి చెందినట్లు ఐఏఎన్ఎస్ తన కథనంలో పేర్కొంది.