టీ20 కప్ గెలిచిన మరుసటి రోజే.. 2027 వరల్డ్‌కప్‌పై గంభీర్ కీలక ప్రకటన

టీమిండియా టీ20 ప్రపంచకప్ 2026 టైటిల్ గెలిచిన ఆనందం నుంచి తేరుకోకముందే, భారత జట్టు హెడ్ కోచ్ గౌతమ్ గంభీర్ భవిష్యత్ ప్రణాళికలను ప్రకటించాడు. 2027లో జరగనున్న వన్డే ప్రపంచకప్‌ కోసం ఐపీఎల్ 2026 సీజన్ ముగిసే నాటికి తమ వద్ద పూర్తి స్థాయి బ్లూప్రింట్ సిద్ధంగా ఉంటుందని గౌతీ స్పష్టం చేశాడు. ఆదివారం అహ్మదాబాద్‌లోని నరేంద్ర మోదీ స్టేడియంలో న్యూజిలాండ్‌పై ఘన విజయం సాధించి, సూర్యకుమార్ యాదవ్ నేతృత్వంలోని జట్టు టీ20 ప్రపంచకప్‌ను కైవసం చేసుకున్న విషయం తెలిసిందే.

ఈ టోర్నీ తర్వాత కొంత విశ్రాంతి తీసుకుని, ఐపీఎల్ ముగిసిన వెంటనే వన్డే ప్రపంచకప్ సన్నాహాలు ప్రారంభిస్తామని గంభీర్ తెలిపాడు. దక్షిణాఫ్రికా, నమీబియా, జింబాబ్వే దేశాలు ఆతిథ్యం ఇవ్వనున్న ఈ మెగా టోర్నీలో పిచ్‌లు ఎక్కువగా బౌన్సీగా ఉండే అవకాశం ఉందని అంచనా వేశాడు. "దక్షిణాఫ్రికాలో క్రికెట్ ఆడటం అంత సులభం కాదు. అక్కడి పరిస్థితులకు సరిగ్గా సరిపోయే ఆటగాళ్లను గుర్తించాల్సి ఉంది. సెలక్టర్లు, కోచ్‌లు కలిసి ఈ పని చేస్తారు. ఐపీఎల్ 2026 ముగిసే సమయానికి, 2027 వన్డే ప్రపంచకప్ కోసం భారత్ వద్ద కచ్చితమైన బ్లూప్రింట్ ఉంటుంది" అని గంభీర్ 'ఇండియా టుడే'తో అన్నాడు.

ఐపీఎల్ 2026 నుంచి ప్రపంచకప్‌కు మధ్య సుమారు 25 నుంచి 30 వన్డేలు ఆడాల్సి ఉందని, కాబట్టి ఎంత త్వరగా ప్రణాళికలు ప్రారంభిస్తే జట్టుకు అంత మేలు జరుగుతుందని గంభీర్ అభిప్రాయపడ్డాడు.

డ్రెస్సింగ్ రూమ్ వాతావరణంపై ఘాటు వ్యాఖ్యలు
ఇదే సమయంలో జట్టు డ్రెస్సింగ్ రూమ్ వాతావరణానికి సంబంధించిన ప్రశ్నలపై గంభీర్ సూటిగా, ఘాటుగా స్పందించాడు. "నా ఫిలాసఫీ చాలా సింపుల్. జట్టులోని మెజారిటీ సభ్యులు నాతో సంతోషంగా లేకపోతే, నేను ఆ డ్రెస్సింగ్ రూమ్‌లో ఉండటంలో అర్థం లేదు. ఎక్కువ మంది సంతోషంగా ఉంటే, నేను సరైన పని చేస్తున్నట్టే" అని అన్నాడు. జట్టు వాతావరణం బాగాలేదని వచ్చే వార్తలను ఆయన కొట్టిపారేశాడు. "జట్టు వాతావరణం బాగాలేదని చెప్పే మాటలన్నీ పనికిమాలినవి. భారత జట్టుపై మీడియా నిఘా, ఫోకస్ చాలా ఎక్కువగా ఉంటుంది. అందుకే జట్టులోని వాతావరణాన్ని ఎవరూ దాచలేరు" అని గంభీర్ స్పష్టం చేశాడు.