గుండె నిండా బాధ.. మైదానంలో పట్టుదల.. పెను విషాదంలోనూ దేశం కోసం ఆడిన ఇషాన్ కిషన్!

టీమ్ ఇండియా టీ20 ప్రపంచకప్‌ను గెలిచిన వేళ దేశమంతా పండగ చేసుకుంటోంది. కానీ ఈ సంబరాల వెనుక ఒక భారత ఆటగాడి కన్నీటి గాథ దాగి ఉంది. కళ్లు చెమర్చే విషాదాన్ని గుండెల్లోనే దాచుకుని, దేశం కోసం వీరోచిత పోరాటం చేశాడు యువ వికెట్ కీపర్ బ్యాటర్ ఇషాన్ కిషన్. ఫైనల్ మ్యాచ్‌కు సరిగ్గా రెండు రోజుల ముందు ఇషాన్ కుటుంబంలో పెను విషాదం చోటుచేసుకుంది. ఒక ఘోర రోడ్డు ప్రమాదంలో తన కజిన్ సిస్టర్, బావ ప్రాణాలు కోల్పోయారు. ఈ వార్త విన్నప్పుడు ఇషాన్ ప్రపంచమే ఒక్కసారిగా ఆగిపోయింది.

బాధను దిగమింగి.. బ్యాట్ ఝుళిపించి!
ఈ దారుణ ఘటన శుక్రవారం జరిగింది. ఈ దుర్వార్త తెలియగానే ఇషాన్ తండ్రి ప్రణవ్ పాండే తన ప్రయాణాన్ని రద్దు చేసుకుని వెంటనే ఘటనా స్థలానికి వెళ్లారు. ఇషాన్ కూడా తన కుటుంబం వద్దకు వెళ్లిపోవాలనుకున్నాడు. కానీ, దేశానికి ప్రపంచకప్ అందించాల్సిన చారిత్రాత్మక బాధ్యత అతడిని మైదానంలోనే ఉండేలా చేసింది. ప్రాక్టీస్ సెషన్లలో కూడా చాలా దిగులుగా కనిపించిన ఇషాన్‌ను సహచర ఆటగాళ్లు ఓదారుస్తూ అండగా నిలిచారు. మైదానంలోకి దిగాక మాత్రం తన వ్యక్తిగత బాధను పక్కన పెట్టి, కేవలం 25 బంతుల్లోనే 54 పరుగులు చేసి విధ్వంసం సృష్టించాడు.

స్వర్గంలో ఉన్న సోదరి కోసం..
మ్యాచ్‌లో హాఫ్ సెంచరీ పూర్తి కాగానే ఇషాన్ కిషన్ బ్యాట్ ఎత్తి ఆకాశం వైపు చూస్తూ నివాళులర్పించాడు. ఆ దృశ్యం చూసిన ప్రతి అభిమాని కళ్లు చెమర్చాయి. తన సోదరి ఆఖరి చూపునకు కూడా నోచుకోలేకపోయినా, ఆమె ఆశించినట్టే భారత్‌కు ప్రపంచకప్ అందించి నిజమైన నివాళి అర్పించాడు. అటు బ్యాటింగ్‌లో మెరుపులు మెరిపిస్తూనే, ఇటు ఫీల్డింగ్‌లోనూ మూడు అద్భుతమైన క్యాచ్‌లతో కివీస్ పతనాన్ని శాసించాడు. ఇషాన్ చూపిన ఈ గుండె నిబ్బరానికి, దేశం పట్ల అతడికున్న అంకితభావానికి ఇప్పుడు క్రీడాలోకం సలామ్ చేస్తోంది.