హైదరాబాదులో రేపు మద్యం షాపులు బంద్

రేపు (మార్చి 3) హోలీ పండుగను పురస్కరించుకుని హైదరాబాద్ నగరంలో మద్యం విక్రయాలపై పోలీసులు ఆంక్షలు విధించారు. నగరంలో శాంతిభద్రతలను దృష్టిలో ఉంచుకుని, ఎలాంటి అవాంఛనీయ సంఘటనలు జరగకుండా ముందస్తు చర్యగా వైన్ షాపులు, బార్లు మూసివేయాలని హైదరాబాద్ సిటీ పోలీస్ కమిషనర్ వి.సి. సజ్జనార్ కీలక ఆదేశాలు జారీ చేశారు.

ఈ ఆదేశాల ప్రకారం.. హోలీ పండుగ రోజున ఉదయం 6 గంటల నుంచి సాయంత్రం 6 గంటల వరకు హైదరాబాద్, సికిందరాబాద్ జంటనగరాల పరిధిలో మద్యం విక్రయాలు పూర్తిగా నిలిపివేయాల్సి ఉంటుంది. వైన్ షాపులతో పాటు కల్లు దుకాణాలు, రెస్టారెంట్లకు అనుబంధంగా ఉన్న బార్లు కూడా ఈ సమయంలో మూసి ఉంచాలని కమిషనర్ స్పష్టం చేశారు. కేవలం హైదరాబాద్ మాత్రమే కాకుండా, స్థానిక పండుగ తేదీలను బట్టి (మంగళవారం లేదా బుధవారం) తెలంగాణలోని అన్ని జిల్లాల్లోనూ మద్యం దుకాణాల బంద్ అమలులో ఉంటుందని సమాచారం.

అయితే, ఈ ఆంక్షల నుంచి స్టార్ హోటళ్లు, రిజిస్టర్డ్ క్లబ్‌లలోని బార్లకు మాత్రం పోలీసులు మినహాయింపు ఇచ్చారు. వీటిని సాధారణ నిబంధనల ప్రకారం నడుపుకోవచ్చని తెలిపారు. పండుగ రోజున మద్యం సేవించి వాహనాలు నడపడం వల్ల ప్రమాదాలు జరిగే అవకాశం ఉండటం, అలాగే శాంతిభద్రతల సమస్యలు తలెత్తకుండా ఉండేందుకే ఈ నిర్ణయం తీసుకున్నట్లు పోలీసులు వెల్లడించారు. ఈ నిబంధనలను ఉల్లంఘించి ఎవరైనా మద్యం విక్రయిస్తే కఠిన చర్యలు తీసుకుంటామని హెచ్చరించారు.