భారత జెండా రంగులతో వెలిగిపోయిన ఇజ్రాయెల్ పార్లమెంట్... మోదీకి అరుదైన గౌరవం

ప్రధాని నరేంద్ర మోదీ తన ఇజ్రాయెల్ పర్యటనపై స్పందిస్తూ, ఈ పర్యటన ఇరు దేశాల మధ్య ద్వైపాక్షిక సంబంధాలను మరింత బలోపేతం చేస్తుందన్న పూర్తి విశ్వాసాన్ని వ్యక్తం చేశారు. 2017 తర్వాత మోదీ ఇజ్రాయెల్‌లో పర్యటించడం ఇది రెండోసారి. ఈ పర్యటన చారిత్రకమని, ఇరు దేశాల స్నేహానికి కొత్త ఉత్తేజాన్ని ఇస్తుందని ఆయన అభివర్ణించారు.

మోదీ పర్యటన సందర్భంగా ఇజ్రాయెల్ ఘన స్వాగతం పలికింది. "ప్రధాని మోదీకి స్వాగతం పలకడానికి ఇజ్రాయెల్ మొత్తం ఉత్సాహంగా ఉంది. ఆయన ఇజ్రాయెల్‌కు నిజమైన స్నేహితుడు" అని ఆ దేశ ప్రతిపక్ష నేత యాయిర్ లాపిడ్ పేర్కొన్నారు. దీనికి తోడు, మోదీ గౌరవార్థం ఇజ్రాయెల్ పార్లమెంట్ 'నెస్సెట్' భవనాన్ని మంగళవారం రాత్రి భారత త్రివర్ణ పతాక రంగులతో దేదీప్యమానంగా అలంకరించారు. ఈ గౌరవానికి మోదీ ధన్యవాదాలు తెలుపుతూ, నెస్సెట్‌లో ప్రసంగించేందుకు ఎదురుచూస్తున్నట్లు తెలిపారు.

స్థానిక మీడియా కూడా మోదీ పర్యటనకు విశేష ప్రాధాన్యత ఇచ్చింది. ప్రముఖ దినపత్రిక 'ది జెరూసలేం పోస్ట్' తన ముఖచిత్రంలో మోదీ ఫొటోను ప్రచురించి, "నమస్తే, రెండు ప్రాచీన దేశాలు కొత్త అధ్యాయాన్ని ప్రారంభిస్తున్నాయి" అనే శీర్షికతో కథనాన్ని ప్రచురించింది.

ఈ పర్యటనలో భాగంగా ప్రధాని మోదీ ఇజ్రాయెల్ ప్రధాని బెంజమిన్ నెతన్యాహు, అధ్యక్షుడు ఐజాక్ హెర్జోగ్‌లతో సమావేశమై కీలక అంశాలపై చర్చలు జరపనున్నారు. రక్షణ, భద్రత, వ్యవసాయం, నీటి నిర్వహణ, సైన్స్ అండ్ టెక్నాలజీ, వాణిజ్యం, పెట్టుబడులు వంటి రంగాల్లో సహకారాన్ని మరింత పెంపొందించడంపై దృష్టి సారిస్తారు. ఈ పర్యటనలో భాగంగా ఇజ్రాయెల్ పార్లమెంట్‌ను ఉద్దేశించి ప్రసంగించనున్న తొలి భారత ప్రధానిగా మోదీ చరిత్ర సృష్టించనున్నారు. అలాగే అక్కడి ప్రవాస భారతీయులతో కూడా ఆయన సమావేశం కానున్నారు. ఈ పర్యటన ఇరు దేశాల వ్యూహాత్మక భాగస్వామ్యానికి కొత్త లక్ష్యాలను నిర్దేశిస్తుందని మోదీ తన ప్రకటనలో పేర్కొన్నారు.