గాయపడినా వెనక్కి తగ్గలేదు.. ముగ్గురు ఉగ్రవాదులను పట్టించిన 'టైసన్'

జమ్మూకశ్మీర్‌లో భద్రతా దళాలు జరిపిన ఆపరేషన్‌లో 'టైసన్' అనే ఆర్మీ జాగిలం అసాధారణ ధైర్యాన్ని ప్రదర్శించింది. ఉగ్రవాదుల కాల్పుల్లో గాయపడినా వెనక్కి తగ్గకుండా, ముగ్గురు జైషే మహ్మద్ ఉగ్రవాదులను మట్టుబెట్టడంలో కీలక పాత్ర పోషించింది.

కిష్టవాడ్ జిల్లా చత్రూ ప్రాంతంలో ఉగ్రవాదులు దాక్కున్నారన్న సమాచారంతో స్పెషల్ ఫోర్సెస్ రంగంలోకి దిగింది. వారి స్థావరాన్ని గుర్తించేందుకు సైన్యంలోని 2 పారా యూనిట్‌కు చెందిన జర్మన్ షెపర్డ్ జాతి శునకం టైసన్‌ను ముందుగా పంపారు. కఠినమైన భూభాగంలోకి దూసుకెళ్లిన టైసన్‌పై ఉగ్రవాదులు కాల్పులు జరిపారు. ఈ క్రమంలో దాని కాలికి బుల్లెట్ గాయమైనా, అది వెనుదిరగకుండా ముందుకు సాగింది.

టైసన్ సాహసం వల్ల ఉగ్రవాదుల కచ్చితమైన స్థానం భద్రతా బలగాలకు తెలిసింది. దీంతో వారు వ్యూహాత్మకంగా దాడి చేసి, జైషే మహ్మద్‌కు చెందిన ముగ్గురు ఉగ్రవాదులను హతమార్చారు. మృతుల్లో రెండేళ్లుగా తప్పించుకు తిరుగుతున్న జైషే కమాండర్ సైఫుల్లా కూడా ఉన్నాడు. ఎన్‌కౌంటర్ స్థలం నుంచి రెండు ఏకే-47 రైఫిళ్లను, ఇతర సామగ్రిని స్వాధీనం చేసుకున్నారు.

గాయపడిన టైసన్‌ను వెంటనే హెలికాప్టర్‌లో ఆసుపత్రికి తరలించి చికిత్స అందిస్తున్నారు. ప్రస్తుతం దాని ఆరోగ్యం నిలకడగా ఉందని అధికారులు తెలిపారు. ఈ ఆపరేషన్‌లో జమ్మూకశ్మీర్ పోలీసులు, సీఆర్‌పీఎఫ్ కూడా పాల్గొన్నారు. ఉగ్రవాద వ్యతిరేక ఆపరేషన్లలో సైనిక జాగిలాల పాత్ర ఎంత కీలకమో ఈ ఘటన మరోసారి నిరూపించింది.